15 jeltoqsanǵa qaraǵan túni Armeniia men Ázerbaijan Taýly Qarabaqtaǵy soǵys kezinde qolǵa túsken tutqyndarmen almasty. Bul aqparatty Azattyqtyń Armian qyzmeti habarlady.
Armian tarabyna - 44 tutqyn, ázerbaijan jaǵyna 12 adam tapsyrylǵan. Resei qorǵanys ministrligi tutqyn almasý protsesine reseilik bitimger sarbazdardyń qatysqanyn habarlady. Osyǵan deiin armian jáne ázerbaijan taraby Shýsha qalasyndaǵy shaiqastan keiin bir-birine máiitter tapsyrǵan.
Jeltoqsan aiynyń basynda Taýly Qarabaqta atysty toqtatý týraly ortaq málimdemege qol qoiylǵannan beri alǵash ret kelisim sharttary buzyldy. Armian jáne ázerbaijan taraby bir-birin kinálady. Ázerbaijan biligi Hadrýtta qalǵan armian áskeri "iritki salyp", "terakt uiymdastyrýmen" ainalysty, sonyń nátijesinde tórt ázerbaijan sarbazy qaza boldy dep málimdedi. Al Armeniia Ázerbaijandy "beibit kelisimdi buzdy" jáne "arandatty" dep aiyptady.
- Taýly Qarabaqta 1990 jyldary bastalǵan shielenis biyl qyrkúiektiń sońynda qaita órshidi. Baký men Erevan jaǵdaidy ýshyqtyrdy dep birin-biri aiyptady. Ázerbaijan áskeriniń Qarabaqtaǵy birneshe aýdanǵa kirgen soń, 9 qarashada Resei, Ázerbaijan prezidentteri jáne Armeniia premer-ministri soǵys qimyldaryn toqtatý týraly ortaq málimdeme jasady. Kelisim boiynsha Ázerbaijan men Armeniia kúshteri sol sáttegi pozitsiialarynda qalyp, aimaqqa Reseidiń bitimger kúshteri kirgizildi. Taýly Qarabaqty qorshai ornalasqan 7 aýdan Ázerbaijanǵa qaitarylyp, Armeniiaǵa Qarabaqpen jalǵastyratyn eni 5 km kólik dálizi berildi. Kelisim boiynsha Armeniia da Ázerbaijandy Nahichevan avtonomiialy respýblikasymen jalǵaityn eni 5 km kólik dálizin berýi tiis. Eki dálizdi de Resei bitimger kúshteri baqylaidy.
