Armeniia áskeri eldiń premer-ministri Nikol Pashinian men onyń úkimetiniń otstavkaǵa ketýin talap etti, - dep habarlaidy RIA Novosti aqparat agenttigi.
Bas shtab basshysy Onik Gasparian qol qoiǵan málimdemede Pashinian men onyń úkimeti eldegi qazirgi daǵdarys kezeńinde naqty ári mardymdy sheshimder qabyldaýǵa qabiletsiz ekeni aitylǵan.
"Armeniia Qarýly kúshteri uzaq ýaqyt boiy qoldanystaǵy biliktiń áskerge qarsy shabýyldaryna shydap keldi, biraq báriniń shegi bar. Armeniia Qarýly kúshteri mindetterin abyroimen oryndady, halyqpen birge jaýmen shaiqasty. Qazirgi biliktiń tiimsiz basqarýy men syrtqy saiasattaǵy eleýli qatelikter eldi qurdymǵa áketip barady", - delingen habarlamada.
Qalyptasqan jaǵdaiǵa bailanysty Qarýly kúshter Pashinian men úkimettiń otstavkaǵa ketýin talap etti.
Al Pashinian armian áskeri kúshteriniń málimdemesin tóńkeris bastaý áreketi dep atady. "Bizdiń barlyq jaqtasymyzdy dál qazir Respýblika alańyna shaqyramyn. Jaqyn arada men tikelei efirde úndeý jasaimyn", - dep jazdy ol Facebook-te.
Osy ýaqytta Pashiniannyń otstavkaǵa ketýin talap etetin oppozitsionerler Erevandaǵy birqatar kósheni jaýyp tastady. Narazylyq sharasyn uiymdastyrýshylardyń biri, "Dashnaktsýtiýn" partiiasynyń jastar odaǵynyń ókili jýrnalisterge sherý Pashinian otstavkaǵa ketkenge deiin jalǵasatynyn aitty.
Quqyq qorǵaý organdarynyń málimetinshe, aktsiianyń eki qatysýshysy politsiia bólimshesine jetkizilgen.
Aita keteiik, 2020 jyldyń qarashasynda Pashinian Qarabaqta atysty toqtatý týraly kelisimge qol qoiǵannan keiin Erevanda narazylyq aktsiialary bastalǵan. Onyń ketýin talap etken oppozitsiialyq kúshter el úkimetiniń burynǵy basshysy Vazgen Manýkiandy premer ornyna usynǵan. Sóitip jeltoqsannyń sońynda Pashinian 2021 jyly kezekten tys parlamenttik sailaý ótkizý týraly aqyldasý úshin ózine saiasi kúshterdi shaqyrdy. Alaida oppozitsiia ókilderi onyń premer-ministr qyzmetinen sailaýǵa deiin ketýin talap etti.
