25 mamyrda ázerbaijan áskerimen atys kezinde bir armian sarbazy oqqa ushty. Bul týraly Armeniia qorǵanys ministrligi habarlady. Eki el arasynda jaǵdai keiingi ýaqytta qaita ýshyǵa bastaǵan.
Ministrliktiń aitýynsha, Armeniianyń Gegarkýnik aýdanyndaǵy Verin Shorja beketinde bolǵan atys kezinde bir armian sarbazy oqqa ushqan. Qazir aýmaqta jaǵdai tynysh, atys toqtaǵan. Ministrliktiń málimetinshe, ázerbaijan taraby armian pozitsiiasyna qarai oq atyp, atys sodan týyndaǵan. Bul aimaq byltyr Taýly Qarabaqtaǵy soǵystan keiin Ázerbaijanǵa qaitarylǵan aýdandarmen shekaralas jatyr.
Al resmi Baký armian sarbazynyń oqqa ushýyna qatysy joǵyn, soldattyń qaiǵyly jaǵdaidan mert bolǵanyn habarlady.
Halyqaralyq qaýymdastyq Taýly Qarabaqty Ázerbaijan bóligi dep biledi, biraq 1990 jyldardan bastap bul aimaqty etnikalyq armiandar baqylai bastaǵan. Byltyr qyrkúiek sońynda aimaqta jaǵdai qaita ýshyǵyp, alty aptaǵa sozylǵan soǵystyń nátijesinde eki jaqtan barlyǵy 6 myńnan astam adam mert boldy. Qarasha aiynda Reseidiń araaǵaiyndyq etýimen taraptar arasynda ortaq kelisim jasalyp, atys toqtady. Kelisimge sáikes, Taýly Qarabaqtyń bir bóligi men jeti aýdan Ázerbaijan jaǵyna qaitaryldy.
