Qostanai oblysynyń ákimi Arhimed Muhambetov Shoqan Ýálihanovtyń týǵan jerin naqty anyqtaý boiynsha tapsyrma berdi, dep habarlaidy "Ult aqparat".
Azamattardy qabyldaýdyń ulttyq kúni aiasynda Qostanai oblysynyń ákimi Arhimed Muhambetov azamattardy jeke máselelerimen qabyldady. Keibir daýly máseleler sottyń sheshimin kútip otyrsa, keibiri kezdesý ornynda sheshilip jatty. Olardyń deni – áleýmettik máseleler. Óńir ákimi ótinishterdiń árbireýin jiti qadaǵalap, jaýapty organdardyń oń sheshýine tapsyrmalar júktedi. Solardyń biri belgili etnograf-ǵalym Shoqan Ýálihanovtyń naqty týǵan jerine qatysty qoiyldy. Áýliekól aýdandyq ardagerler keńesiniń tóraǵasy Ákimbek Qabdenovtiń sózinshe, búginde Shoqan Ýálihanovtyń týǵan jerine bailanysty ekiudai pikir qalyptasqan.
«1985 jyly Shoqannyń 150 jyldyǵy toilandy. Sol jyly Álkei Marǵulannyń zertteý jinaqtary arqyly naqty týǵan jeri Qusmuryn aýyly ekeni dáleldendi. Bizdiń Qusmuryn aýylynda Shoqannyń kindigin kesken Dármen degen ájeidiń urpaqtary turady. Olar da Qusmurynda týǵanyn rastaidy. Biraq keiingi jyldary bir oblystyń eki aýdany Shoqannyń týǵan jerine talasyp júr. Qazir Kúntimes aýylynda ómirge keldi dep jazylady. Endi osy máseleni memlekettik dárejede kóterýdi usynamyz», - deidi aqsaqal.
Al oblystyq mádeniet basqarmasynyń basshysy Erlan Qalmaqov aitqandai, 1994 jyly ǵalym Manash Qozybaev arhiv qujattary arqyly Kúntimes aýyly ekenin dáleldegen.
«Tarihshynyń málimetine súiensek, Qusmuryn bolysy bolǵanymen, Qusmuryn beketi keiinnen qurylǵan. Shyńǵys Ýálihanov Kúntimeste aǵa sultan bolyp turǵan kezde Shoqan dúniege kelgen. Byltyr «Kieli Qazaqstan» jobasy boiynsha elordalyq komissiia ǵalymnyń týǵan jerin Kúntimes dep bekitip berdi», - deidi Erlan Qalmaqov.
Oblys ákimi elordadan komissiia shaqyryp, bul máseleni taǵy bir zertteýdi usyndy. Endi Shoqan Ýálihanovtyń týǵan jerin naqty anyqtaý boiynsha jumystarmen oblystyq mádeniet basqarmasy ainalysady. Ákimbek Qabdenovtiń ótinishi «Kieli Qazaqstan» jobasynyń arnaiy komissiiasyna, tarih institýyna jiberiledi.
