Qostanai oblysynyń ákimi Arhimed Muhambetov politsiia departamentiniń jeke quramymen kezdesti, dep habarlaidy "Ult aqparat".
Oblys ákimi Arhimed Muhambetov ishki ister organdarynyń halyqpen tyǵyz qarym-qatynastyń servistik modelin engizip, aýqymdy jumys júrgizip jatqanyn aitty. Tiisinshe, bul – azamattardyń senim deńgeiin arttyrýǵa jáne «keri bailanys» ornatýǵa baǵyttalǵan keshendi shara bolmaq.
«Memleket basshysy halyqqa Joldaýynda politsiia jumysy ashyqtyqqa negizdelýi tiis degen mindet qoidy. Osy mindetti iske asyrý úshin Qostanai oblysy ákimdigi sońǵy jyldary 8 mlrd teńgege jýyq qarajat jumsaǵan. Biyl politsiia departamentin materialdyq-tehnikalyq jaraqtandyrýǵa 1,7 mlrd teńge bólindi. Osynyń arqasynda bailanys quraldary, beine baqylaý kameralary, zańbuzýshylyqtardy avtomatty túrde tirkeýdiń statsionarlyq keshenderi satyp alyndy. Jalpy politseiler qoǵamnyń ár salasynda úlgi bolýy tiis. Osyny únemi este saqtaýlaryńyz qajet», - deidi oblys ákimi.
Qostanai oblysy PD bastyǵy, politsiia general-maiory Beket Aimaǵambetov óńirde qylmys deńgeii aitarlyqtai tómendegenin atap ótti. Atap aitqanda kisi óltirý, densaýlyqqa aýyr ziian keltirý, zorlaý, qaraqshylyq, tonaý, urlyq, alaiaqtyq, buzaqylyq jáne urlyq qylmystary azaiǵan. Tek «Avtoýragan» júiesiniń kómegimen ótken jyly 66 myńnan astam jol qozǵalysy erejesin buzý anyqtaldy.
2020 jyly aýyr jáne asa aýyr qylmystardyń anyqtalý deńgeii 100%-ǵa jetken. Zańsyz ainalymnan 500 keliden astam esirtki tárkilendi.
«Tsifrlyq Qazaqstan» baǵdarlamasyn iske asyrý sheńberinde qylmystyq isterdiń 85%-y elektrondyq formatta tergelip jatyr. Bul úshin oblystyń tergeý jáne anyqtaý bólimsheleri qajetti tehnikamen jáne arnaiy qurylǵylarmen tolyq qamtamasyz etilgen.
Kezdesý barysynda oblys ákimine birneshe suraq qoiyldy. Qostanai qalasy politsiia basqarmasy jergilikti politsiia qyzmeti bastyǵynyń mindetin atqarýshy Talǵat Júsipov Qostanaida jańa shaǵyn aýdandar salynyp jatqanyn alǵa tartty. Soǵan sáikes ýchaskelik politsiia pýnktterin salý qajettigi týyndap otyr. Búginde Qostanai qalasynda politsiianyń bes tirek pýnkti qajet. Bular Qonai, Áýejai, Bereke, Ortalyq bazar móltek aýdandary men Drýjba aýylynda ornalasady.
Arhimed Muhambetov bul máseleni baqylaýǵa alatynyn aitty.
Kezdesý sońynda patrýldik politsiia qyzmetkeri Baǵdat Beisenov óńir basshysyna ishki ister organdarynyń qyzmetkerlerin qoldaǵany úshin alǵysyn bildirdi.
