BQO-daǵy Beles aýylynda orta mekteptiń muǵalimi Sherhan Baizenovti Denis Ten týraly atyshýly jazbasy úshin áriptesteri sókti, - dep habarlaidy Tengrinews.kz tilshisi.
Áriptesteri matematika páni muǵaliminiń áigili sportshynyń ólimi jaily pikirin estigende ańtarylyp qalǵanyn aitady. Sóitsek, Baizenov qaza tapqan sportshynyń tanymal mánerlep syrǵanaýshy, Sochide ótken 2014 jylǵy Olimpiadanyń qola júldegeri ári qazaqstandyq ekenin bilmegen bolyp shyqty.
"Mundaidy kútpedim. Bul jaǵdaidy estigende ańtarylyp qaldym. "Ne úshin bulai jazdyń?" dep suradym. Sóitsem ol: "Tústen keiin demalyp, telefonymdy qarasam, "Denis Ten óldi" dep, bári jylap jatyr. Anyqtamai jatyp, ony qytailyq eken dep oilappyn. Onyń chempion ekenin ári qazaqstandyq ekenin bilmedim" dep jaýap berdi. Men oǵan adamdardy ultyna qarap bólmeý kerek dedim. Úndemedi", - deidi mektep direktory Azamat Maiemer.
Mektep direktorynyń aitýynsha, aldaǵy ýaqytta Sherhan Baizenov bul mektepten jumystan shyǵady.
"Ol mektepte endi jumys istemeidi. Biraq qazir ony jumystan shyǵara almaimyn. Qylmystyq is ashyldy, protsess júrip jatyr, ony jumystan shettete almaimyn. Barlyǵy ýaiymdap: "Ol osylai jumys istei bere me? Nege jumystan qýmaisyz?" dep surap jatyr. Tergeý aiaqtalǵan soń, men shara qabyldaimyn", - dedi Azamat Maksimuly.
Sherhan Baizenov 12 tamyzǵa deiin eńbek demalysynda eken. Qazirgi ýaqytta ol eshqaida ketpeý týraly qolhatpen bosatylǵan. Bul mektepte Baizenov 2014 jyldan beri jumys istep keledi eken, ol Oraldaǵy kolledjdi támamdaǵan.
Áriptesteriniń aitýynsha, Baizenov keiin keshirim surap, video jariialaǵan.
