Túrkistanda «Ardagerler uiymy» respýblikalyq qoǵamdyq birlestiginiń 35 jyldyǵyna arnalǵan merekelik is-shara ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Aldymen qoǵam qairatkeri Asanbai Asqarovtyń ómirinen syr shertetin «Alash rýhty azamat» atty kitaptyń tanystyrylymy ótti. Kitapta ultyn súigen perzenttiń bolmysyn ashatyn dúnieler, estelikter engizilgen. Is-shara aiasynda qoǵam qairatkeri men ardagerlerge arnalǵan kórme uiymdastyryldy. Óńir ardagerlerin quttyqtaýǵa oblys ákiminiń mindetin atqarýshy Darhan Satybaldy arnaiy kelip, qurmetin kórsetti.
«Memleket basshysy Qasym-Jomart Toqaev óz Joldaýlarynda aǵa býynǵa qoldaý kórsetý máselesin únemi nazarda ustap keledi. Túrkistan oblysynda 180 myńǵa jýyq zeinet jasyndaǵy qarttarymyz bar. Olar qoǵamdy damytý jolynda úles qosa bildi. Ózderińiz biletindei, Túrkistan oblysyn qurý jónindegi jarlyqtyń shyqqanyna 4 jyldan asa ýaqyt boldy. Osy ýaqyt kóleminde óńirimizde aýqymdy jobalar qolǵa alyndy. Qurylys jumystary qarqyndy júrip jatyr. Biraq jyldar boiy kezeń-kezeńimen jalǵasatyn eń mańyzdy jumys bar. Ol – rýhaniiat. Búgingi tańda oblystyq ardagerler uiymy osy maqsatta jemisti eńbek etip júr. Biz árqashan qarttarymyzdy qurmettep, ardagerlerimizdi ardaqtaý arqyly jarqyn bolashaqqa bet alamyz. Búgingi merekelik jiyndy paidalanyp, elimizdiń damýyna qosqan úlesterińiz ben úlgi-ónegelerińiz úshin alǵysymdy bildiremin. Oblys rýhaniiatynyń jandanýy jolyndaǵy barlyq bastamalaryńyzǵa sáttilik, denderińizge saýlyq tileimin», – degen oblys ákiminiń mindetin atqarýshy óńirdiń damýyna úles qosyp júrgen ardagerlerdiń birqataryn marapattady.
Merekelik jiynda eńbegimen daralanǵan aqsaqaldar men el analaryna oblystyq máslihat hatshysy Qairat Balabiev pen «Ardagerler uiymy» respýblikalyq qoǵamdyq birlestiginiń Túrkistan oblystyq filialynyń tóraǵasy Jeńisbek Máýlenqulovtyń da alǵys hattary tapsyryldy. Jeńisbek Máýlenqulov Ardagerler keńesiniń atqarǵan jumystaryna toqtalyp, eldi birlikke, jastardy otansúigishtikke shaqyrý baǵytyndaǵy tirlikterdi baiandady.
Igi is-shara merekelik kontsertpen jalǵasyn tapty.
1987 jyly Almatydaǵy quryltai aiasynda Qazaqstannyń ardagerler uiymy qurylǵan bolatyn. Biyl elimizdegi eń úlken ári asa mańyzdy qoǵamdyq birlestiktiń qurylǵanyna 35 jyl tolyp otyr. Uiymnyń negizgi maqsaty – ardagerlerdiń quqyqtaryn qorǵaý, laiyqty áleýmettik-turmystyq jaǵdaiyn qamtamasyz etýge yqpal jasaý, olarǵa mádeni, meditsinalyq jáne basqa da kómek túrlerin jaqsartýǵa járdemdesý, jastardy otanshyldyqqa tárbieleý.
