Árbir qazaqstandyq qorshaǵan ortaǵa degen jaýapkershiligin sezinýi tiis. Mundai pikirdi QR Parlamenti Senatynyń tóraǵasy Máýlen Áshimbaev bildirdi, dep habarlaidy QazAqparat.
«Búgin - halyqaralyq tazalyq kúni. Osynaý úlken halyqaralyq bastamany memlekettik emes uiymdar kóterip, sońǵy 10 jyldan astam ýaqyt boiy búkil álemde qyrkúiek aiynyń ishinde osyndai sharalar ótýde. Mysaly, ótken jyly halyqaralyq tazalyq kúnine 180 memlekette 20 mln-nan astam adam qatysqan. Búgin Ekologiia ministrliginiń jáne elorda ákimdiginiń bastamasymen osyndai jaqsy shara ótip jatyr. Bir jaǵynan turmystyq qatty qalyqtardan saiabaqtarymyzdy, kóshelerimizdi tazartsaq, ekinshi jaǵynan aǵash otyrǵyzýdamyz. Bul quptarlyq bastama. Jalpy, qorshaǵan ortany qorǵaý bizdiń basty basymdyqtarymyzdyń biri. Prezidentimiz Joldaýynda da osy máselege úlken kóńil bólgenin bilesizder», - dedi Senat tóraǵasy «World clean up day» – «Búkilálemdik tazalyq kúni» aktsiiasy barysynda.
Osy rette Máýlen Áshimbaev Memleket basshysy jyldyń sońyna deiin jańa Ekologiialyq kodeks qabyldaýdy tapsyrǵanyn, onda atalǵan saladaǵy problemalardy sheshýge qatysty sharalar qamtylatynyn atap ótti. Prezidentimizdiń bastamasymen ormandarymyzda 2 mlrd-qa jýyq, qalalarda 15 mln aǵash otyrǵyzylatyndyǵyn eske saldy.
«Bul - úlken bastama. Al búgin osynaý úlken bastamanyń tusaýkeseri elordamyzda ótip jatyr desek, artyq aitqandyq emes. Jalpy, aldaǵy ýaqytta osy baǵytta kóp jumys atqarýymyz kerek. Zańdar da qabyldanýy tiis. Osy baǵyttaǵy jumysty depýtattar da jalǵastyrady. Qorshaǵan ortany qorǵaý tek memlekettik organdardyń maqsaty men mindeti emes. Óitkeni, qoǵam men memlekettik organdardyń jumysyn biriktirgende ǵana jumys nátijeli bolady. Sondyqtan árbir qazaqstandyq qorshaǵan ortaǵa degen jaýapkershiligin sezinýi tiis. Tabiǵat bailyǵyn qorǵaý, aialaý, tabiǵatqa degen durys kózqaras ata-babamyzǵa tán qasiet. Qazaq halqy ejelden tabiǵatpen úlesimdi tirshilik etken», - dedi Senat spikeri.
Aita keteiik, sharaǵa QR Ekologiia, geologiia jáne tabiǵi resýrstar ministri Maǵzum Myrzaǵaliev, elorda ákimi Altai Kólginov, QR Parlamenti Senaty men Májilisiniń depýtattary, eriktiler, memlekettik qyzmetshiler jáne qala turǵyndary qatysyp jatyr.
