Árbir aryzdyń artynda adam taǵdyry, ondaǵan, tipti júzdegen adamnyń múddesi tur. Bul týraly búgin QR Bas prokýratýrasynyń basshylyq quramymen keńes ótkizgen Prezident Qasym-Jomart Toqaev aitty, dep habarlaidy "Ult aqparat".
Keńes barysynda Memleket basshysy baqylaýshy organdardyń qyzmetkerlerine «Halyq únine qulaq asatyn memleket» tujyrymdamasyn iske asyrýdyń mańyzdylyǵy týraly aitty. Onda azamattardyń ótinishterimen jumys isteýge úlken mán berilgenin eskertti.
«Prokýratýra organdaryna jyl saiyn turǵyndardan óte kóp aryz-shaǵym kelip túsedi. Sońǵy úsh jyldyń ishinde 650 myńǵa jýyq shaǵym berilgen. Árbir aryzdyń artynda adam taǵdyry, ondaǵan, tipti júzdegen adamnyń múddesi tur», – dedi Prezident.
Qasym-Jomart Toqaev azamattardyń shaǵymdaryna naqty ári túsinikti jaýap berý qajet ekenin atap ótti.
Sondai-aq Memleket basshysy prokýratýra qyzmetiniń mańyzdy baǵytynyń biri retinde yqtimal áleýmettik narazylyq oshaqtarymen tiimdi jumys júrgizý ekenin aitty.
Prezident baqylaýshy organ túrli áleýmettik qaqtyǵystardyń destrýktivti áleýetin tómendetý úshin aldyn-alý sharalaryn qabyldaýy kerek, sondai-aq, ýaqytyly tólenbeitin jalaqylardy, zańsyz qysqartýlardy jáne eńbek qatynastaryndaǵy basqa da jaǵymsyz áreketterdi der kezinde anyqtap, jolyn kesýi kerek dep sanaidy.
«Ótken jyldyń ózinde ǵana sizderdiń nátijeli jumystaryńyzdyń arqasynda 29 myń qyzmetkerdiń jalaqydan qaryz bolǵan 2,7 milliard teńge qarjysy tólendi. Bul jumysty jalǵastyrý kerek. Ásirese, keibir kásiporyndarda shielenistiń órshýi baiqalady. Mundai máselelerde aimaqtaǵy prokýrorlar naqty pozitsiia ustanyp, belsendi áreketterge barýy tiis. Ár is boiynsha ońtaily sheshim shyǵaryp, zań ústemdigine qol jetkizý qajet. Meniń tapsyrmam boiynsha qazir ákimder osy máselemen ainalysyp jatyr. Bul jumysqa prokýratýra da aralasýy tiis», – dedi Memleket basshysy.
