Shákárim atyndaǵy Semei memlekettik ýniversitetiniń professory, filologiia ǵylymdarynyń doktory Arap Espenbetov QR Prezidenti Qasym-Jomart Toqaevtyń «Abai jáne HHI ǵasyrdaǵy Qazaqstan» atty maqalasyna qatysty pikir bildirdi, dep habarlaidy QazAqparat.
«Bul – asqaq asýlarǵa nusqaityn, qazaqstandyqtardy tutas ulttyq ideiaǵa jumyldyratyn baǵdarlamalyq maqala. Adamzattyń Abaiynyń 175 jyldyq mereitoiy – ortaq mereke. Prezident «Keler urpaq Abaidyń sara jolyn jalǵaýy tiis. Bul – uly aqyn armanynyń oryndalýy. Sondyqtan biz Abaidyń oiynan da, toiynan da taǵylym alýǵa tiispiz», – dep basty nazardy toi toilaýǵa emes, oi oilaýǵa buryp, ysyrapshylyqty, dańǵazalyqty doǵarýmyz kerektigin basa eskertti. Bizdiń mindet – Abai murasyn nasihattaý arqyly qazaqty álemge tanytý. Urpaqtyń boiyna Abai eńbekteriniń biik taǵylymyn sińirý. Abai toiynan keiin urpaq oilanýy kerek. Toidan qandai úlgi-ónege kórdik, jas býynǵa uly aqynnyń tereń maǵynaly oilaryn jetkize aldyq pa? Osyndai saýaldarǵa jaýap bere alsaq toi ǵibraty aiqyndalmaq», - deidi Arap Espenbetov.
Professordyń pikirinshe, Memleket basshysy qazaqtyń bitim-bolmysyn, mádenietin Abai arqyly tanytý jaily súbeli oi tastady.
«Abaidyń gýmanistik ideialary – adamzat órkenietin baiytýdyń negizi. Prezident halqymyzdyń rýhani jáne mádeni qundylyqtaryn Abai arqyly nasihattaý jaily kerektigin aitty. Rasymen de uly Abai álemdik deńgeidegi tulǵa desek te onyń shyǵarmalarynyń búkil dúniejúzilik dárejede áli de keńinen tanyla qoimaýy bizdi qatty oilandyrýy kerek» - deidi filologiia ǵylymdarynyń doktory.
Onyń aitýynsha, maqaladaǵy Semei óńirine airyqsha kóńil aýdarylýy qala jurtshylyǵyn qýanyshqa keneltkeni sózsiz.
«Semei óńiri – Alashtyń júregi. Iadrolyq synaqtan kóz ashpai ańyrap qalǵanda, jahandyq jalmaýyzdan qutqarǵan Elbasyna Semei halqynyń myń san alǵysy kúnde aitylady. Semei jurtshylyǵy daǵdarys keziniń ózinde berekesi qashpai, uiymshyldyq kórsete bildi. Bul sonaý Ulylar rýhymen jalǵasyp jatqan tektiliktiń bir kórinisi bolar. Maqaladaǵy «uly Abai men Shákárimniń, Muhtar Áýezovtiń kindik qany tamǵan óńir airyqsha qurmetke laiyq. Osyǵan orai shahardy áleýmettik-ekonomikalyq turǵydan keshendi túrde damytyp, ondaǵy tarihi-mádeni nysandardy jańa talapqa sai jańǵyrtamyz» degen joldar Semei shaharynyń mádeni-ekonomikalyq jaǵynan jandana, kórkeie túsýine senimimizdi nyǵaitty. Biz bir nársege asa mán berýimiz kerek! Abai – bir ǵana rý, óńir ne bolmasa eldiń aqyny emes! Ol – adamzattyń Abaiy! Barshany baýyryna basqan uly tulǵanyń shyǵarmashylyǵy arqyly biz ultty uiystyryp, berekesi men dostyǵy jarasqan birtutas Qazaq eliniń yntymaǵy men birligin arttyra túsýge eseli eńbektengenimiz abzal», - deidi Arap Espenbetov.
Eske sala ketsek, «Egemen Qazaqstan» gazetiniń búgingi sanynda QR Prezidenti Qasym-Jomart Toqaevtyń «Abai jáne HHI ǵasyrdaǵy Qazaqstan» atty maqalasy jariialanǵan bolatyn.
