Aralas mektepterdi kezeń-kezeńimen memlekettik tilde bilim berýge kóshirý kerek. Bul týraly Taraz qalasyndaǵy №34 orta mekteptiń direktory Dinara Nuralieva aitty, dep habarlaidy QazAqparat.
«Búgingi tańda Jambyl oblysynda aralas mektepterde memlekettik tilde bilim beretin birinshi synyptar kóbeie bastady. Mektep direktory retinde osy oraida óz usynysymdy jetkizgim keledi. Eger respýblikamyzdyń ár óńirinde aralas mektepter kezeń-kezeńimen memlekettik tilde bilim berýge kóshse, sizder qalai qaraisyzdar?! Bul sheshim barlyq qazaqstandyq balalardy kishkentai kúninen eshqandai bólinýge jol bermei, qazaq tilin jetik meńgerýge naqty qadam bolar edi. «El bolam deseń, besigińdi túze». Bizde bir ǵana ortaq – memlekettik tilimiz, bir ǵana – ultymyz, bir ǵana – Otanymyz bolýy tiis!», - dedi ol Elbasy Nursultan Nazarbaevtyń tóraǵalyǵymen ótken Qazaqstan halqy Assambleiasy keńesiniń otyrysynda.
Ákesi – dúngen, anasy – uiǵyr, arǵy atalary – orys, ózbek, tatar jáne basqa da birneshe ulttan taraityn Dinara Nuralieva ózi siiaqty azamattardyń tólqujatyna «qazaq» dep jazatyn ýaqyttyń kelgenin aitady.
«Qazirgi ýaqytta Qazaqstanda boiynda 7-8 etnostyń qany bar men siiaqty júz myńdaǵan adam bar. Múmkin osyndai azamattardy tólqujatyna «qazaq» dep jazatyn ýaqyt kelgen shyǵar? Biz árqashan tatýlyq pen birlikte ómir súrip kelemiz. Ortaq úiimizde bir úzim nandy bólip jep otyrǵan jaiymyz bar. Basty bailyq – turaqtylyq ekenin esten shyǵarmaýymyz qajet. Biz árdaiym birge bolsaq, áli talai asýlardy baǵyndyramyz», - dedi mektep direktory.
.jpeg)