Búgin Parlament Senatynyń tóraǵasy Máýlen Áshimbaev VII shaqyrylymdaǵy Parlamenttiń birinshi sessiiasynyń ashylýynda Prezident belgilep bergen mindetterdiń mańyzyna nazar aýdardy, dep habarlaidy "Ult aqparat".
«Sessiianyń ashylýynda Prezident Qasym-Jomart Toqaev memlekettik organdardyń aldynda turǵan negizgi maqsattarǵa toqtalyp ótti. Olardyń bári halyqtyń ómir súrý sapasyn jaqsartatyn, elimizdiń saiasi jáne áleýmettik-ekonomikalyq damýyna tyń serpin beretin bastamalar. Osyǵan bailanysty Parlament pen Úkimetke mańyzdy mindetter júktelip otyr. Jariialanǵan reformalardy sapaly zańdarmen qamtamasyz etý – bizdiń basty mindetimiz. Zańdar eń aldymen ulttyq múddeni qorǵaýǵa tiis. Al ulttyq múdde degenimiz – halyq pen memlekettiń múddesi», - dep toqtaldy M. Áshimbaev Senattyń jalpy otyrysynda.
Osy oraida ol Prezident reformalaryn iske asyrý úshin Májilispen jáne Úkimetpen birlesip nátijeli jumys isteletinin atap ótti.
«Memleket basshysy atap ótkendei, qoǵamdy alańdatqan máseleler Parlamentte talqylanýy qajet. Parlament ózekti máselelerdiń sheshimin tabatyn ortalyqqa ainalýǵa tiis. Sondyqtan elmen etene jumys isteý - asa mańyzdy. Ár zań jobasyn talqylaǵan kezde qoǵamnyń pikirin eskerýimiz kerek. Senat jumysyna qoǵamdyq uiymdar men áleýmettik toptardyń ókilderin, tiisti mamandardy keńirek tartýymyz qajet. Mundai qadam zań shyǵarý jumysynyń jáne qabyldanyp jatqan zańdardyń tiimdiligin arttyratyny sózsiz. Aldymyzda aýqymdy mindetter tur», – dedi Máýlen Áshimbaev.
