Sport salasyndaǵy basshylar 2024 jylǵy Olimpiadaǵa daiyndyq máselelerin talqylady, dep habarlaidy "Ult aqparat" Mádeniet jáne sport ministrliginiń baspasóz qyzmetine silteme jasap.
Jiynda sportshylardyń iri halyqaralyq jarystarda kórsetken aralyq nátijeleri, olardy daiarlaý júiesindegi ózgerister, meditsinalyq-biologiialyq qamtamasyz etý jáne dopingke qarsy baǵdarlamalar, sondai-aq óńirlerde olimpiadalyq sport túrleriniń jai-kúii men damýyna qatysty máseleler qaraldy.
Mádeniet jáne sport ministri Dáýren Abaev olimpiadaǵa qatysýǵa múmkindik beretin litsenziialar sanyna emes, medaldardyń sapasyna nazar aýdarý qajet ekenin aitty. Sebebi jalpy komandalyq esep altyn medaldar sany negizinde júrgiziledi.
Kezdesý barysynda ministr federatsiia basshylary men jattyqtyrýshylarǵa birqatar tapsyrma berdi. Máselen, endigi kezekte quramaǵa jastardy tartý arqyly komandalardy jasartý jáne halyqaralyq jarystarǵa irikteýdi barynsha ashyq ótkizý boiynsha jumysty belsendi júrgizý qajet.
«Joǵary jetistikter sportyn damytý úshin úlken qarajat bólinip, qoldaý kórsetilip, qajetti jaǵdailar jasalyp jatyr. Degenmen ministrlik qaiyrymdylyqpen ainalyspaidy. Sondyqtan ár teńge úshin qatań suraý bolady. Muny osynda otyrǵan árqaisysyńyz este saqtaýǵa tiissizder. Joǵary jetistikter sporty naqty nátijelerge negizdeledi, qalǵany – dene shynyqtyrý. Sondyqtan bizge jańa jeńister kerek», – dedi Dáýren Abaev.
Jiyn barysynda Sportty damytý direktsiiasynyń direktory Oralbai Jaqsymbetov Parijde 329 medal jiyntyǵy sarapqa salynatynyn aitty (Tokioda 339 medal jiyntyǵy oinalǵan edi).
Aita keteiik, elimizdiń qurama komandalary jyl basynan beri 19 álem chempionatyna jáne 20 Aziia chempionatyna qatysyp, 140 medal jeńip aldy: onyń ishinde 35 altyn, 40 kúmis, 65 qola bar. 2022 jyldyń sońyna deiin bizdiń sportshylar taǵy 3 álem chempionatyna jáne 3 Aziia chempionatyna qatyspaq.
«Qurama komanda qataryna sportshylardy irikteý rásimderiniń ashyq ótýi mańyzdy. Bul bizdiń basty nazarymyzda bolady. Aldaǵy ýaqytta ministrlik sportshylardyń barlyq jetistikterin, jarystarǵa qatysý kestesin baqylaýǵa múmkindik beretin e-sport júiesin iske qosady. Ádilettilik pen ashyqtyq mańyzdy, sport júiesinde salaýatty básekelestik bolýy tiis», – dedi Dáýren Abaev.
Ministr sport basqarmalarynyń basshylaryna olimpiadalyq sport túrleriniń basymdylyǵyn eskere otyryp, joǵary sport sheberligi mektepteriniń jumys isteý qaǵidattary men tásilderin qaita qaraýdy, federatsiialarmen birlesip, sport rezervin daiyndaýdyń biryńǵai standartyn jáne oqytý baǵdarlamalaryn ázirleýdi tapsyrdy.
Úsh jarym saǵatqa sozylǵan jiynda Sporttyq meditsina jáne ońaltý ortalyǵynyń direktory Azamat Nurmatov, Ulttyq dopingke qarsy ortalyqtyń direktory Maira Baqasheva, sport basqarmalarynyń basshylary, sport túrleri boiynsha federatsiia ókilderi jáne basqa da jaýapty tulǵalar jumys nátijeleri týraly baiandady.
