Qazaqstanda óńirlerdiń plastikpen lastanýyn zertteitin «Jasyl Arystan» jobasy tanystyryldy, dep habarlaidy QazAqparat.
«Jasyl Arystan» – jas jeke ekologiialyq uiym. Men jáne meniń pikirles dostarym elimizdiń ekologiialyq máselelerin sheshýge belsendi qatysýdy uiǵardyq. Bizdiń túrli salalarda tájiribe men bilimimiz bar jáne biz únemi qorshaǵan ortany saqtaýǵa qatysty máselelerge tap bolamyz, sondyqtan bar kúshimizdi biriktirýdi sheshtik. Qyzmetimizdiń basty baǵyttarynyń biri – plastikalyq buiym tutynýdy azaitý jáne plastikalyq qaldyqtardy durys kádege jaratý bastamasy. «Plastikten taza Qazaqstan» jobasy aiasynda ǵylymi tásilder men álemdik tájiribeler kómegimen densaýlyǵymyz úshin asa qaýipti plastikalyq qaldyqtar máselesin jeńe alatynymyzǵa senemiz», - dedi «Jasyl Arystan» jeke qorynyń basqarma tóraǵasy Gúlnar Erejepova Ortalyq kommýnikatsiialar qyzmetinde ótken brifingte.
Spiker sońǵy ýaqytta adamzattyń plastmassany tutyný kólemi on ese artqanyn atap ótti. Qazirgi ýaqytta álemde jylyna 400 mln tonnadan astam plastik óndiriledi.
1950-2018 jyldar arasynda 8,5 milliard tonna plastikalyq buiym óndirilgen.
«Sarapshylardyń aitýynsha, qazir álem boiynsha barlyq plastikalyq qaldyqtyń 5-10% ǵana qaita óńdeýge jiberiledi. 12% - órteledi, 79% - kúresinge jáne qorshaǵan ortaǵa tastalady. Plastikalyq buiymdardyń uzaq saqtalatynyn eskersek (500 jylǵa deiin), bul jaǵdaidyń apattyq aýqymyn baiqaýǵa bolady. Qazaqstanda da jaǵdai máz emes. Elordany halyq arasynda «ushatyn paketter qalasy» dep ataidy. Qazaqstanda jylyna 5 mln tonnadan astam qatty turmystyq qaldyqtar paida bolady, onyń keminde 11-15% plastmassa quraidy. Iaǵni, árbir qazaqstandyq (jańa týǵan náresteni qosa alǵanda) jylyna shamamen 42 kg plastikti qoqysqa tastaidy», - deidi G. Erejepova.
Spiker barlyq qoǵamdyq uiymdardy, bei-jai qaramaityn azamattardy birlesip jumys isteýge shaqyrdy.
«Bul - tek memlekettiń nemese ministrliktiń máselesi emes. Azamattyq qoǵamnyń osy máseleni memlekettik organdarmen birge sheshetin ýaqyty keldi. Plastikpen lastaný máselelerin durys sheshý joldaryn taýyp, jańa derekter alý úshin biyl elimizdiń barlyq óńirlerinde plastikpen lastaný boiynsha zertteý ótkizýdi josparlaimyz. Jumys barysynda, mysaly, statistikalyq taldaý, kóshpeli saraptamalar, halyq saýalnamasy, plastikalyq buiymdardyń óndirisin zertteý, ekonomikalyq jáne ekologiialyq zertteýler syndy túrli tásilder qoldanylady. Bul elimizde lastaný máselesiniń aýqymyn naqty baǵalaýǵa jáne sheshimin tabýǵa múmkindik beredi», - dedi G. Erejepova.
