Ozyq zamanaýi úrdisterdi úlgi tutqan jańa saiasi mádeniet qalyptastyrý – Jańa Qazaqstandy qurýdyń alǵysharty. Bul týraly Ulytaý oblysynda ótip jatqan Ulttyq quryltaidyń otyrysynda Májilis tóraǵasy Erlan Qoshanov aitty, dep habarlaidy QazAqparat.
«Jańa Qazaqstandaǵy qoǵamnyń birigýi men jumylýynyń bir arnaǵa toǵysýynyń asa qajet ekeni daýsyz. Ol – ýaqyt talaby! Biraq, mártebesi biik, mańyzy tereń bul is qandai negizde júzege asady? Qoǵamnyń jańa rýhani bolmysy men etikalyq ustanymy qandai bolmaq? Búgingi tańda bul suraqtardyń mańyzdylyǵyn joqqa shyǵarýǵa bolmas! Óitkeni, qazaqstandyqtardy joǵary ulttyq qundylyqtar men demokratiialyq saiasi dástúr negizinde ǵana toptastyrýǵa bolady.
Referendýmnyń shyńy men shyndyǵy bizge kem degende úsh naqty mindet pen maqsat qoiyp otyr», - dedi Qoshanov.
Osy oraida ol birinshi kezekte tártip pen zańdylyqtyń mańyzdylyǵyn atady. Ádiletti Qazaqstan ornatýdyń basty sharty – zań ústemdigin ornyqtyrý, qoǵamda quqyqtyq mádeniet qalyptastyrý.
«Bul turǵydan da elimizde kóptegen máseleler qordalanyp qaldy. Baýyrjan Momyshulynyń «Tártipsiz el bolmaidy, tártipke baǵynǵan qul bolmaidy» degen sózin ósiet etip ustansaq artyq bolmas. Qazirgi zańnama boiynsha árkimniń zańdy túrde miting nemese beibit sherý ótkizýge haqysy bar. Miting degen kúndelikti ómirdiń kórinisine ainaldy. Alaida keibir azamattar óziniń pikirin bildirý kezinde zań aiasynan asyp ketetin is-áreketterge barady», - dedi Májilis tóraǵasy.
Qoshanov ekinshi mindet retinde jańa qoǵamdyq sanany atap ótti.
«Jańa Qazaqstanda jańa qoǵamdyq oi-sana qalyptastyrýymyz kerek.
Bul barshamyzdy mezi qylǵan jasandylyqtan, biýrokratizmnen, jalǵandyqtan, pafostan jirenip, ádilet pen adaldyq jaǵyna birjolata shyǵýymyzdy talap etedi. Parlamenttiń de, partiialardyń da basty mindeti – elde bolyp jatqan oń ózgeristerdi halyqqa jetkizý, jas urpaqtyń boiyna sińirý! Biz Prezident kórsetken saiasi mejege, reformalardyń qarqynyna ilesip, jańa jaǵdaida jumys isteýge beiimdelýimiz qajet. Osy oraida «Kúshti Prezident – yqpaldy Parlament – esep beretin Úkimet» qaǵidasy «jaýapty qoǵam men jaýapty azamat» formýlasymen úndesip tur», - dedi ol.
«Úshinshi kezekte – jańa saiasi mádeniet. Ozyq zamanaýi úrdisterdi úlgi tutqan jańa saiasi mádeniet qalyptastyrý – Jańa Qazaqstandy qurýdyń alǵysharty. Elimizde konstrýktivti mádeniet, pikirtalas mádenietin qalyptastyrýǵa tiispiz. Ár adam jeke basqa emes, ulttyq múddege qyzmet etýge talpynýy kerek. Quryltai osy saiasi mádenietti jańa deńgeige kóteredi dep bilemiz», - dedi Májilis tóraǵasy.
