Aqtóbede qoqys jáshiginen tabylǵan jańa týǵan nárestege dárigerler “Batyr” esimin berdi. Qazir sábi oblystyq balalar aýrýhanasynda em qabyldap jatyr, onyń jaǵdaiy turaqty baqylaýda, dep habarlaidy ult.kz.
Mamandardyń aitýynsha, aýrýhanaǵa túsken kezde náresteniń salmaǵy 2 keli 900 gramm bolǵan. Qazirgi tańda onyń salmaǵy 3 keliden asyp, densaýlyǵynda oń dinamika baiqalǵanymen, dárigerler jaǵdaiyn áli de ortasha aýyr dep baǵalap otyr.
Oblystyq densaýlyq saqtaý basqarmasynyń ókili Áliia Sharbaqovanyń aitýynsha, sábi tolyq meditsinalyq baqylaýda.
“Qajetti barlyq em kórsetilýde. Barlyq rásimder aiaqtalǵannan keiin bala ‘Úmit’ sábiler úiine ornalastyrylady”, – dedi ol.
Quqyq qorǵaý organdary balanyń anasyn anyqtaý jáne oqiǵanyń mán-jaiyn tekserý jumystaryn jalǵastyryp jatyr.
Aita keteiik, buǵan deiin Aqtóbede qoqys jáshiginen jańa týǵan náreste tabylǵany týraly habarlanǵan bolatyn. Turǵyndar jylaǵan daýysty estip, jedel járdem men politsiia shaqyrǵan. Dárigerlerdiń der kezinde kórsetken kómeginiń arqasynda sábi aman qalǵan.
