Aqtóbede toidan keiin jappai ýlaný tirkelip, 100-den astam adamnan ishek infektsiiasynyń belgileri anyqtaldy. Oqiǵa Muǵaljar aýdany Qandyaǵash qalasyndaǵy «Tumar» meiramhanasynda ótken toidan keiin bolǵan, dep habarlaidy ult.kz.
Atalǵan derek boiynsha Qazaqstan Respýblikasy Qylmystyq kodeksiniń 304-baby («Sanitariialyq qaǵidalardy nemese gigienalyq normativterdi buzý») boiynsha sotqa deiingi tergep-tekserý bastaldy. Quzyrly organdar oqiǵanyń mán-jaiyn tolyq anyqtaý úshin qajetti tergeý amaldaryn júrgizip jatyr.
Oblystyq politsiia departamentiniń habarlaýynsha, tergeý nátijesi boiynsha zańǵa sáikes tiisti protsessýaldyq sheshim qabyldanady.
Dárigerlerge ishek infektsiiasy belgilerimen 102 adam júginip, olardyń bir bóligi aýrýhanaǵa jatqyzylǵan. 34 naýqasta salmonellezge kúdik tirkelgen. Barlyq jaǵdai boiynsha sanitarlyq-epidemiologiialyq baqylaý qyzmeti tekserý júrgizip, zerthanalyq taldaýǵa synamalar alynǵan.
