Aqtóbe oblysynda densaýlyq saqtaý salasyndaǵy úsh nysannyń qurylysyna 5,7 mlrd teńgeden astam qarjy bólindi. Jobalar Aqtóbe qalasynda jańa jedel járdem qosalqy stansasyn, Yrǵyz aýdanynda emhana jáne Jańaqonys turǵyn alabynda oblystyq psihikalyq densaýlyq ortalyǵynyń qosymsha ǵimaratyn salýdy kózdeidi, dep habarlaidy ult.kz.
Barlyq nysandy 2027 jyldyń sońyna deiin aiaqtaý josparlanyp otyr.
Aqtóbe qalasynyń Qarǵaly turǵyn alabynda quny 3 mlrd teńgeden asatyn jedel jáne shuǵyl meditsinalyq kómek qosalqy stansasy salynady. Nysan 10 sanitarlyq kólikke arnalǵan garajben jabdyqtalyp, jylyna 25 myń shaqyrtýǵa qyzmet kórsetýge eseptelgen.
Jańa stansa jedel járdem brigadalarynyń kelý ýaqytyn qysqartýǵa múmkindik beredi. Ol Qarǵaly, Aqjar, Kóktem, Qyzyljar jáne qala mańyndaǵy basqa da qarqyndy damyp jatqan turǵyn alaptaryna qyzmet kórsetedi.
Qazir jumys istep turǵan qosalqy stansanyń jeti brigadasy shamamen 110 myń adamǵa qyzmet kórsetedi. Atalǵan aýmaqtardyń odan ári damýyna bailanysty jedel járdem qyzmetine túsetin júktemeniń artýy kútiledi.
Sonymen qatar Yrǵyz aýdandyq aýrýhanasynyń janynan aýysymyna 300 adam qabyldaityn eki qabatty emhana salynady. Jobanyń quny – 1,3 mlrd teńge.
Al Jańaqonys turǵyn alabyndaǵy oblystyq psihikalyq densaýlyq ortalyǵy úshin quny 1,4 mlrd teńge bolatyn eki qabatty ǵimarat boi kóteredi.
Jańa nysandardyń iske qosylýy meditsinalyq uiymdardyń kabinet qoryn keńeitip, patsientterdi qabyldaý jaǵdaiyn jaqsartýǵa múmkindik beredi.
Jobalar óńirdegi meditsinalyq infraqurylymdy jańǵyrtyp, turǵyndarǵa kórsetiletin meditsinalyq qyzmetterdiń qoljetimdiligi men sapasyn arttyrýǵa baǵyttalǵan.
