AQSh-ta tabylǵan máiit buǵan deiin iz-túzsiz joǵalyp ketken Qazaqstan azamatyna tiesili bolýy múmkin. Bul týraly Syrtqy ister ministrliginiń resmi ókili Erlan Jetibaev málimdedi, dep habarlaidy ult.kz.
Onyń aitýynsha, bul aqparat ministrlikke brifing bastalar aldynda ǵana AQSh-taǵy áriptesterinen kelip túsken.
«Qazaqstan Respýblikasy Syrtqy ister ministrligi AQSh-tyń quzyretti organdarynan Qazaqstan azamaty bolýy múmkin adamnyń máiiti tabylǵany týraly aqparat aldy. Qazirgi ýaqytta Amerika tarapy barlyq qajetti rásimderdi júrgizip jatyr. Bizdiń diplomattar AQSh-tyń quzyretti organdarymen jáne azamattyń týystarymen turaqty bailanysta. Olarǵa qajetti konsýldyq-quqyqtyq kómek kórsetilýde», – dedi Erlan Jetibaev.
SIM ókiliniń sózinshe, áńgime Chikago qalasy mańynda turǵan Qazaqstan azamaty týraly bolyp otyr. Vedomstvo AQSh tarapynyń resmi qorytyndylary shyqqannan keiin qosymsha aqparat beretinin habarlady.
Eske salaiyq, buǵan deiin áleýmettik jelilerde 24 jastaǵy qazaqstandyq Áset Quralbaidyń AQSh-ta joǵalyp ketkeni týraly aqparat taraǵan bolatyn. Ol Illinois shtatyndaǵy Ford-Haits (Ford Heights) aýdanynda turǵan.
Jaqyndarynyń aitýynsha, Áset sońǵy ret 2026 jyldyń 2 maýsymynda bailanysqa shyqqan. Al 7 maýsymnan beri onyń telefony óshirýli bolǵan. Qujattary men bank kartalary úiinde qalǵany aitylǵan.
Keshe Qazaqstannyń Syrtqy ister ministrligi azamattyń joǵalyp ketý faktisinen habardar ekenin málimdep, qazaqstandyq diplomattardyń AQSh-tyń quqyq qorǵaý organdarymen birlesip oqiǵanyń mán-jaiyn anyqtap jatqanyn habarlaǵan edi.
Qazirgi ýaqytta tabylǵan máiittiń kimge tiesili ekeni resmi túrde naqtylanyp jatyr. Tergeý men saraptama nátijeleri jariialanǵannan keiin qosymsha málimet beriledi.
