AQSh pen Iran ózara túsinistik týraly memorandým mátini boiynsha kelisimge keldi. Qujatqa 19 maýsymda Shveitsariiada qol qoiý josparlanyp otyr, dep habarlaidy ult.kz.
Mehr agenttiginiń habarlaýynsha, kelissózder barysynda taraptar birqatar mańyzdy máseleler boiynsha ymyraǵa kelgen.
Kelisim sharttaryna sáikes, AQSh Irannyń buǵattalǵan aktivterinen 24 milliard dollardy bosatýǵa jáne onyń jartysyn mámile kúshine engenge deiin qaitarýǵa kelisken. Sonymen qatar Vashington Tegeranǵa qarsy munai sanktsiialaryn alyp tastap, jańa shekteýler engizbeýge mindetteme alady.
Sondai-aq AQSh pen onyń odaqtastary Iran ekonomikasyn qalpyna keltirýge baǵyttalǵan kólemi keminde 300 milliard dollar bolatyn baǵdarlamany usynbaq.
Óz kezeginde Iran Iadrolyq qarýdy taratpaý týraly shart aiasyndaǵy mindettemelerin oryndaýǵa jáne iadrolyq qarý jasamaýǵa kelisken. Buǵan qosa, Irannyń zymyrandyq baǵdarlamasy AQSh-pen júrgizilgen kelissózderdiń kún tártibinen shyǵarylǵan.
Málimetterge sáikes, qorytyndy kelisim BUU Qaýipsizdik Keńesiniń qararymen bekitiledi. Sonymen birge AQSh teńiz blokadasyn toqtatyp, Ormýz buǵazyn ashýǵa nietti.
Osydan keiin Italiia, Frantsiia, Germaniia jáne Ulybritaniia Iranǵa qarsy sanktsiialardy joiýǵa daiyn ekenin málimdedi. Eýropanyń tórt eli taratqan birlesken málimdemede Irannyń iadrolyq baǵdarlamasy boiynsha naqty ári senimdi qadamdaryna jaýap retinde sanktsiialardy alyp tastaýǵa ázir ekenderi aitylǵan.
