Aqmola oblysynyń Tselinograd aýdanynda dárigerlerdiń der kezinde durys diagnoz qoimaýy saldarynan densaýlyǵyna edáýir ziian kelgen turǵyn sot arqyly emhanadan 1,6 mln teńgeden astam ótemaqy óndirip aldy, dep habarlaidy ult.kz.
Bul týraly Aqmola oblystyq soty habarlady.
Oqiǵa byltyr shildede bolǵan. Turǵyn aýdandyq emhanaǵa bas aýrýy, jótel, murynnyń bitelýi, dene qyzýy jáne iyqtyń aýyrǵanyna shaǵymdanyp barǵan. Dárigerler oǵan JRVI, jedel nazofaringit, sozylmaly bronhittiń asqynýy jáne polisegmentarlyq pnevmoniia diagnozdaryn qoiǵan.
Alaida birneshe kúnnen keiin naýqastyń jaǵdaiy jaqsarmaǵan. Kerisinshe, qoldary men iyq býyndary aýyryp, isik paida bolǵan. Osy shaǵymmen qaita barǵan kezde dáriger oǵan revmatoidty artrit diagnozyn qoiyp, travmatologqa qaralýǵa keńes bergen.
Travmatolog iyq býyny bailamdarynyń sozylýy jáne shamadan tys kúsh túsýi degen diagnoz qoiǵan. Keiin emhana dárigeri de osy diagnozdy qaitalaǵan.
Arada bir apta ótkende naýqastyń jaǵdaiy kúrt nasharlap, ony Astana qalasyndaǵy aýrýhanaǵa jatqyzýǵa týra kelgen. Astanalyq dárigerler shuǵyl ota jasap, naýqastyń denesinen 1,5 litr iriń shyǵarǵan.
Isti qaraǵan sot emhana dárigerleriniń salǵyrttyǵy saldarynan naýqastyń densaýlyǵyna edáýir ziian kelgenin anyqtady.
Birinshi satydaǵy sot talap aryzdy ishinara qanaǵattandyrdy. Emhana naýqasqa 700 myń teńge moraldyq ziian úshin ótemaqy jáne uzaq ýaqyt eńbekke jaramsyz bolǵandyqtan joǵaltqan 914 myń teńge tabysyn óteýge mindetteldi.
Osylaisha, emhana turǵynǵa jalpy 1 mln 614 myń teńge tóleýi tiis.
