Aqmola oblysy Býrabai aýdanyna qarasty Shýchinsk qalasynda jeke turǵyn úi órtenip, eki adam kóz jumdy, dep habarlaidy ult.kz.
Aldyn ala málimet boiynsha, aýmaǵy 90 sharshy metr bolatyn úidegi órtti sóndirý kezinde qutqarýshylar 1968 jyly týǵan er adam men onyń jubaiynyń denesin tapqan.
Aqmola oblysy Politsiia departamentiniń málimetinshe, oqiǵanyń qylmystyq sipaty bolýy múmkin. Osy derek boiynsha qylmystyq is qozǵalyp, tergeý bastaldy.
Áleýmettik jelilerde jergilikti turǵyndar úidi qasaqana órtegen adam qaza tapqan erli-zaiyptylardyń uly bolýy múmkin degen boljam aityp jatyr. Sondai-aq jelide onyń 2009 jyly týǵan baýyryn óltirgeni týraly aqparat taraǵan.
Alaida bul málimetterdi quqyq qorǵaý organdary ázirge resmi túrde rastaǵan joq. Sondyqtan kúdiktiniń kim ekeni jáne onyń burynǵy qylmysqa qatysy týraly aqparat áleýmettik jelidegi rastalmaǵan derek retinde qarastyrylýy tiis.
Qazir politsiia oqiǵanyń barlyq mán-jaiyn anyqtap, tergeý júrgizip jatyr.
Aita keteiik, Aqmola oblysynda sábiin emizgen kúii uiyqtap ketken ana perzentinen aiyryldy.
