Atyraýdaǵy aýyr qylmystyq oqiǵadan keiin psihikalyq densaýlyq ortalyǵynda em qabyldaǵan Aqbaian Muqanǵalieva aýrýhanadan shyqty. Qazir ol jaqyndarynyń qaraýynda, dep habarlaidy ult.kz.
Aqparatqa sáikes, sońǵy ýaqytta Aqbaian balalarymen kezdesip, olarmen qaita qaýyshyp júr. Qazir onyń densaýlyǵyn qalpyna keltirýmen qatar, qalypty ómirge qaita beiimdelýine basymdyq berilip otyr.
Ol áleýmettený jáne ońaltý maqsatynda túrli ortalyqtarǵa baryp, qajetti saýyqtyrý sharalarynan ótip jatyr.
Aqbaiannyń apasy D.-nyń aitýynsha, sińlisiniń qazirgi jaǵdaiy jaqsy. Aýrýhanadan shyqqannan keiin ózin birshama jaqsy sezine bastaǵan.
«Qazir Aqbaiannyń jaǵdaiy jaqsy. Úige shyqty. Ózin jaqsy sezinedi. Endigi jerde tolyqtai qalypqa kelýi úshin ýaqyt qajet. Saýyqtyrý, emdeý jumystaryn jalǵastyryp jatyrmyz. Adamnyń osyndai jaǵdaidan keiin qaita aiaqqa turyp, ómirge beiimdelýi ońai emes. Sondyqtan oǵan jaqyndarynyń qoldaýy da mańyzdy», – dedi ol.
Jaqyndarynyń sózinshe, Aqbaiannyń tolyqtai qalypqa kelip, kúndelikti ómirge qaita beiimdelýi úshin áli de ýaqyt qajet.
Ne bolǵan edi?
Biyl Atyraý oblysynda Sultan Sársemálievke qatysty atyshýly qylmystyq is qoǵamnyń nazaryn aýdardy. Ol burynǵy áieli Aqbaian Muqanǵalievanyń ata-anasy men eki baýyryn, iaǵni tórt adamdy óltirdi dep aiyptaldy.
Tergeý materialdaryna sáikes, qaza tapqandardyń arasynda 66 jastaǵy Maqsot Qarabalin, 64 jastaǵy Násip Óteshqalieva, 35 jastaǵy Meiramgúl Qarabalina jáne 32 jastaǵy Naýryz Muqanǵaliev bolǵan.
Sot barysynda Sultan Sársemálievtiń Aqbaianmen qarym-qatynasy, olardyń ajyrasýy jáne otbasyndaǵy janjaldar týraly da aityldy. Erli-zaiypty 2016 jyly shańyraq kótergen. 2022 jyly Aqbaian balalaryn alyp, ata-anasynyń úiine ketken. Keiin erli-zaiypty qaita qosylǵanymen, qarym-qatynastarynda qiyndyqtar jalǵasqan.
Qylmystyq is barysynda Aqbaian Muqanǵalievaǵa da qatysty tergeý júrgizilgen. Oǵan burynǵy kúieýiniń qylmysyn jasyrdy degen kúdik bolǵan. Alaida keiin prokýratýra onyń qylmysty jasyrǵanyn rastaityn jetkilikti dálel anyqtalmaǵanyn málimdep, is toqtatylǵan.
