Atyraý oblysynda tórt adamnyń ólimine qatysty rezonansty qylmystyq is boiynsha ótken sot otyrysynda jańa beinematerialdar zertteldi. Jazbalardyń birinde sottalýshy Sultan Sársemálievtiń jubaiy Aqbaian Muqanǵalievadan jaýap alynǵan sát kórsetildi, dep habarlaidy ult.kz kznews.kz saityna silteme jasap.
Sotta aitylǵan málimetterge sáikes, Aqbaian Muqanǵalieva psihonevrologiialyq dispanserdiń aqparattyq júiesinde esepte turǵan. Qazirgi ýaqytta ol psihiatriialyq mekemede em qabyldap jatyr.
Sýdia Zarema Hamidýllina áieldiń tergeý kezinde bergen jaýabyn oqyp berdi. Onyń sózinshe, ol Qyzylqoǵa aýdany Jangeldin aýylyndaǵy mektepti bitirgen. Keiin Aqtóbedegi kolledjde oqyǵan. Oqý aiaqtalǵan soń Atyraýda túrli uiymdarda jumys istegen. 2016 jyly Sultan Sársemálievke turmysqa shyqqan. Otbasynda bes bala tárbielenip otyr.
Tergeýshiniń suraqtaryna jaýap bergen Muqanǵalieva balalarynyń bir bóliginiń týǵan jylyn ǵana atai alǵan. Al kenje balasynyń týǵan jylyn esine túsire almaǵan.
Sondai-aq ol sońǵy balasyn dúniege ákelgennen keiin densaýlyǵynda másele paida bolǵanyn aitty. Onyń sózinshe, sol kezde Mahambet aýdanynda balasyna enesi qaraǵan. Áiel basy qatty aýyrǵanyn, dárigerlerdiń keńesimen kúieýimen birge Túrkiiaǵa tekserilýge barǵanyn jetkizdi.
"Men basymdy teksertip, em aldym. Túrkiiada kúieýim ýaqytsha jumys istedi. Biz qonaqúide turdyq. Men kóbine uiyqtap jattym. Telefonym bolǵan joq, ony Sultan alyp alǵan. Politsiia meni jáne kúieýimdi ne úshin ustaǵanyn bilmeimin", – dedi ol jaýap alý kezinde.
Beinejazbaǵa qaraǵanda, Muqanǵalieva birqatar suraqqa naqty jaýap bere almaǵan. Ol kóbine "Bilmeimin" dep jaýap bergen. Budan bólek, tergeý áreketteri kezinde sharshaǵanyn aityp, keibir suraqtarǵa jaýap berýden bas tartqan.
Sotta usynylǵan materialdarǵa sáikes, keiin oǵan arnaiy em qabyldaý usynylǵan.
