Bloger Denis Krivosheev Almaty mańynda qulaǵan Bek Air ushaǵynyń ekinshi ushqyshy Meiirjan Moldaqulov óz úiinde qaitys bolǵanyn jazdy, – dep habarlaidy «Ult aqparat».
«Keshke ókpe tromboemboliiasynan 2019 jyldyń 27 jeltoqsanyndaǵy áýe apatynan aman qalǵan Bek Air kompaniiasynyń ekinshi piloty Meiirjan Moldaqulov qaitys boldy. Keshe ǵana ol ózin jaqsy sezingen, saýyǵyp kele jatqan edi. Odan jaýap ta alyndy, jáne de ol úlken suqbat berýge daiyndalyp júrgen bolatyn», - dep jazdy Krivosheev.
Qazaqstanǵa Almaty qalasynyń densaýlyq saqtaý basqarmasy atalǵan aqparatty rastady.
«Apatqa ushyraǵan Bek Air ushaǵynyń ekinshi piloty 28 qańtar kúni qaitys boldy. Saǵat 18.00-de jedel meditsinalyq járdem qyzmetine densaýlyqtyń kúrt nasharlaýyna qatysty habar tústi. Jedel járdem ýaqytynda keldi. Júrekke reanimatsiialyq sharalar jasaldy, biraq nátije bolmady», – dedi vedomstvodan.
Aita ketiik, Bek Air ushaǵynyń ekinshi piloty Meiirjan Moldaqulov 21 qańtarda turaqty halde №4 qalalyq klinikalyq aýrýhanadan úiine shyǵarylǵanyn eske saldy. Odan keiin onyń emhanada ambýlatorlyq em qabyldap, kardiolog, hirýrg, terapevt pen psiholog baqylaýynda bolǵan.
Osy oraida Ishki ister ministrligi ekinshi ushqyshtyń ólimine qatysty túsinikteme berdi.
Ishki ister ministriniń birinshi orynbasary Marat Qojaev Bek Eir-diń qulaǵan ushaǵynyń ekinshi ushqyshy neden kóz jumǵanyn sot-meditsinalyq saraptama anyqtaitynyn aitty.
«Adam óliminiń kez kelgen faktisi boiynsha qajetti sot-meditsinalyq saraptama taǵaiyndalady. Aldyn ala málimet boiynsha, ushqyshtyń ólimine áýe apatynan alǵan jaraqaty nemese basqa da kriminaldy faktiler sebep bolmaǵan. Másele onyń densaýlyǵynda shyǵar, bálkim. Biraq munyń bárin sot-meditsinalyq saraptama naqty kórsetedi», - dedi Qojaev májilis kýlýarynda.
