Reseide sońǵy aida keminde 9479 meditsina qyzmetkerine koronavirýs juqqan. Eldiń 70-ten astam aimaǵynan jariialanǵan aqparatqa súiengen Associated Press agenttigi osyndai málimet jariialady.
Agenttiktiń jazýynsha, 70-ten astam dáriger koronavirýstan qaitys bolǵan jáne keibir meditsina qyzmetkerleri olardyń sany budan da kóp bolýy múmkin ekenin aitqan.
AP agenttigi jariialaǵan maqalada COVID-19 indeti kezinde reseilik dárigerler ushyrasqan máseleler týraly aitylǵan. Maqalada aýrýhanalarda qorǵanysh quraldarynyń tapshylyǵy, máselelerdi ashyq aitqan qyzmetkerlerdiń qylmystyq qýdalaýǵa nemese qoqan-loqyǵa kezikkeni aitylady.
Agenttik ózge meditsina qyzmetkerlerimen birge Máskeý mańyndaǵy Reýtov qalalyq ortalyq aýrýhanasynyń dárigeri Irina Vaskianinanyń sózin keltiredi. Onyń aitýynsha, aýrýhanada 40-tan astam qyzmetkerge koronavirýs juqqan. "Novaia gazeta" basylymy sáýir aiynda Reýtov aýrýhanasyndaǵy qyzmetkerlerdiń prezident Vladimir Pýtinnen kómek surap, málimdeme joldaǵanyn jazǵan edi.
"Mediazona" basylymy eki kún buryn Reseide koronavirýstan keminde 186 meditsina qyzmetkeri qaitys bolǵan dep habarlaǵan. Basylym zertteýinde reseilik dárigerler uiymdastyrǵan koronavirýstan qaitys bolǵan dárigerlerdiń aty-jóni jazylǵan memorialdyq joba deregine súiengen.
