Aýyl sharýashylyǵy boiynsha ortalyqta qabyldanatyn sheshimder halyqtyń qajettiligine emes, jumys kórsetkishine baǵyttalǵan. Sybailas jemqorlyqqa qarsy is-qimyl agenttiginiń tóraǵasy Marat Ahmetjanov vedomstvonyń alqa májilisinde osyndai pikir bildirdi, dep habarlaidy QazAqparat.
Óz baiandamasynda Marat Ahmetjanov agenttik sybailas jemqorlyq táýekelderine taldaý júrgizý formatyn ózgertetinin atady.
«Biz keshendi monitoringke kóshemiz. Iaǵni, biz jeke organdy emes, tutas strategiialyq salany tańdap, egjei–tegjeili, tereń taldaý júrgizemiz», - dedi ol.
Aitýynsha, Memleket basshysynyń tapsyrmasymen pilottyq joba retinde agroónerkásiptik keshendegi sýbsidiialaý salasyna egjei-tegjeili tekserý bastalyp ketken kórinedi. Aýyl sharýashylyǵyn qoldaýǵa sońǵy 5 jylda 1 trln teńge bólingen.
«Jyl saiyn memleket aýyl sharýashylyǵyn damytýǵa, jańa jumys oryndaryn qurýǵa jáne aýyl halqynyń ál-aýqatyn jaqsartýǵa aitarlyqtai qarajat bóledi. Degenmen, jazda kókónis baǵasynyń ósýi halyqtyń narazylyǵyn týdyrdy. Ortalyqta qabyldanatyn sheshimder halyqtyń qajettiligine emes, jumys kórsetkishine baǵyttalǵan», - dedi agenttik tóraǵasy.
Marat Ahmetjanov sýbsidiia salasynda halyqty tolǵandyratyn másele kóp ekenin aitady.
«Bul keshendi taldaýdyń basty maqsaty – sýbsidiialar salasyndaǵy problemalardy anyqtaý. Dotatsiialar halyqqa qanshalyqty jetip jatyr? Olardy alý ashyq pa? Ashyq bolmasa, oǵan ne kedergi? Qandai sybailas jemqorlyq táýekelderi bar? Kemshilikter anyqtalǵannan keiin sarapshylar men tiisti ministrlikterdi tarta otyryp, olardy sheshý joldary ázirlenedi», – dedi Sybailas jemqorlyqqa qarsy is-qimyl agenttiginiń basshysy.
Marat Ahmetjanov agroónerkásip kesheninen keiin kezek avtojol jáne kóliktik baqylaý salasyna tietinin eskertti.
