Tanymal ánshi Nazima (Nazima Jánibekova) Almatydaǵy áýejaiǵa shabýyl jasalǵan ushaqtyń birinde otyrǵanyn aitty, dep habarlaidy Sputnik Qazaqstan.
Nazimanyń kontserti 5 qańtarǵa josparlanǵan bolatyn. Biraq qalada tártipsizdikter bastalyp ketkennen keiin mádeni sharany ótkizbeýge sheshim qabyldandy. Sol kezde ol Máskeýge bilet izdeýge kiristi.
"Bilet taptym da, áýejaiǵa 4 saǵat buryn bardym. Áýejaiǵa kelsem, ishki reisterdi toqtatypty. Al halyqaralyq reisterge otyrǵyzý júrip jatqan. Men geitke júgirip jettim. Terezeden qaraqshylardyń jaqyndap kele jatqany kórinip turdy. Sońǵy jolaýshy ushaqqa kirgennen keiin esikti jaýyp tastady. Odan keiin ushaq traptan bylai qarai shyqty. Biraq ushqan joq", - dep jazdy Nazima óziniń Instagram paraqshasynda.
Ushaq áýege kóterilgen joq. Pilot búlikshilerdiń dichspetcherlik bólimdi basyp alǵanyn jariialady. Áýejaimen bailanys úzildi. Ushýǵa múmkindik bolmady.
"Sonda 15-aq minýt ótken. Artynan qaraqshylar dichspetcherlik bólimniń byt-shytyn shyǵarǵanyn estidik. Pilot ishte adamnyń otyrǵany kórinbesin dep, illiýminatordyń perdesin jabýǵa buiyrdy. Internet te bolǵan joq. Eshkimmen bailanysa almadyq. Ainalada ne bolyp jatqanyn bilmedik. Ushaqty jaryp jibere me dep qoryqtyq. Sebebi astynda kólikter júrdi. Bir nárse izdegendei boldy", - deidi Jánibekova.
Jolaýyshylar ushaqta, shamamen, 15 saǵat otyrdy. Áýejaidy bosatqannan keiin barlyq adam qaýipsiz jerge kóshirildi. Al Nazima erteńinde Shymkent qalasyna ketti.
Bas kezinde ánshi Shymkentke tanystarymen birge jetip alýǵa kelisken. Biraq olar kelmei qaldy. Sóitse, qalanyń ishinde lańkester oq jaýdyrǵan. Odan keiin basqa kólikti shaqyrýǵa týra keldi.
"Áýejaida bolǵan oqiǵa esimnen ketpeidi. Geitte turǵan stiýardessa maǵan "Júgir! Olar jaqyndap qaldy! Bizde evakýatsiia bastaldy, qazir úlgermei qalasyń!" dep aiqailady. Daýysy men kózi áli esimde. Ol qatty qorqyp turǵan. Men bolsam, ushaqqa qarai júgirip, ishimnen "Qudaiym-aý, bizge ushyp ketýge múmkindik bershi" dep oiladym", - deidi Nazima.
