Qazaqstannyń Túrkiiadaǵy Elshiligi, Halyqaralyq Túrki akademiiasy jáne Eýraziia jazýshylar odaǵynyń uiymdastyrýymen «Uly dalanyń uly tulǵalary ál-Farabi, Abai jáne Jambyl» atty is-shara ótti, dep habarlaidy QR SIM baspasóz qyzmeti.
Bul jiyn ǵalym ári filosof Ábý Nasyr ál-Farabidiń týǵanyna 1150 jyl jáne aqyn ári oishyl Abai Qunanbaiulynyń týǵanyna 175 jyl tolýyna orai 2020 jyly bastalǵan eske alý sharalarynyń úilesimdi jalǵasy boldy. 2021 jyly Uly dala aqyndyq dástúriniń kórnekti ókili Jambyl Jabaevtyń týǵanyna 175 jyl tolyp otyrǵany málim.
Is-sharada sóz sóilegen Qazaqstan Elshisi Abzal Saparbekuly 2020 ál-Farabi jáne Abai jyly aiasynda Túrkiiada qyrýar sharýa atqarylyp: kóshelerge, parkter men túrli mekemelerge dala danyshpandarynyń attary berilgenin, eskertkishteri ashyldy, kitaptary túrik tilinde jaryq kórgenin jetkizdi. 2021 jyly Jambyldyń murasyn tanytý jyly bolatynyn aitqan Elshi Jambyldyń shyǵarmalaryn qazaq halqynyń mádeni entsiklopediiasy jáne rýhani qazynasy retinde sipattady.
2021 jyldyń búkil Túrki álemi úshin mańyzdy mereitoilardy atap ótetin jyl bolatynyn eske salǵan A.Saparbekuly elimizdiń táýelsizdiginiń 30 jyldyq mereitoiynyń atalyp ótiletinin aitty. Elshi Túrkiianyń Qazaqstannyń táýelsizdigin alǵash moiyndaǵan el bolǵanyn atap ótip, «Osyǵan bailanysty Túrkiiada biz keń aýqymdy is-sharalar ótkizýdi josparlap otyrmyz», - dedi. Elshi táýelsizdiktiń 30 jyldyǵymen qatar, Qazaqstan tarihyndaǵy birqatar mańyzdy oqiǵalardyń jyldyqtary men belgili tulǵalardyń mereitoilarynyń atalyp ótelitinin málimdedi.
Is-sharada sóz sóilegen Halyqaralyq Túrki akademiiasynyń Prezidenti Darhan Qydyráli túrik halqyna atajurt Qazaqstannyń ystyq sálemin bildire otyryp, pandemiiaǵa qaramastan, Abai mereitoiynyń Túrkiiada óte aýqymdy toilanýynyń túrik halqynyń Qazaqstanǵa degen ystyq yqylasynyń kórsetkishi bolyp tabylatynyn aitty. «Ahmet Iasaýi, Sultan Alparslan, Hajy Bektash Veli, Ahi Evran, Farabi, Abai jáne Jambyl – bizdiń ortaq qundylyqtarymyz» dep aitqan D.Qydyráli osy tulǵalar arqyly túrki áleminiń birligi nyǵaiyp kele jatqanyna nazar aýdardy.
Eýraziia jazýshylar odaǵynyń tóraǵasy Iakýp Ómeroǵlý ál-Farabi, Abai jáne Jambylǵa arnalǵan osy is-shara bolǵan kúni Ankarada danyshpan Tonykóktiń eskertkishiniń ashylýyn jaqsylyqtyń bir nyshany dep jordy. Ómeroǵlý «Dala ádebietiniń uly aqyny Jambyl» kitabynyń avtory Myrzatai Joldasbekovtyń óz eńbeginde Orhon eskertkishteri men Jambyldyń aqyndyq dástúri arasyndaǵy sabaqtastyqty pash etkenin málimdedi.
Is-sharada sóz sóilegen TÚRKSOI Bas hatshysy Dúisen Qaseinov 2020 jyly ál-Farabi men Abai jylyna arnalǵan is-sharalar týraly aqparat berdi. Ál-Farabidiń «Mýzykanyń úlken kitaby» arabshadan túrikshege aýdarylyp jatqanyn aitqan D.Qaseinov jańa basylymnyń jaqynda oqyrmandarymen qaýyshatynyn jetkizip, súiinshi berdi. Sonymen birge, ol TÚRKSOI-dyń 2021 jyly Jambyldyń mereitoiynyń laiyqty túrde atap ótý úshin bar kúshimen jumys isteitinin málimdedi.
Saltanatty sózderden keiin M.Joldasbekovtyń «Dala ádebietiniń uly aqyny Jambyl» kitabynyń túrikshege aýdarylǵan nusqasynyń tusaýkeseri boldy. Osydan keiin, 2020 jyly ál-Farabi men Abaidyń Túrkiiada tanylýyna úles qosqan ǵalymdar, jýrnalistter men memlekettik qairatkerler QR Prezidentiniń, Halyqaralyq Túrki akademiiasynyń, QR Mádeniet jáne sport ministrliginiń jáne Qazaqstan Elshiliginiń alǵys hattary jáne medaldarymen marapattaldy. Atap aitqanda, «Ulttyq kózqaras» jýrnalynyń bas redaktory, Túrkiia Parlamenti depýtaty Metin Gúndoǵdýǵa, TRT Avaz arnasynyń úilestirýshisi Sedat Saǵyrkaiaǵa jáne Pamýkkale ýniversitetiniń professory Nergiz Biraiǵa Prezident Qasym-Jomart Toqaevtyń alǵys hattary tabystaldy.
.jpeg)