Ankarada Qazaqstannyń Túrkiiadaǵy Elshiliginiń jáne EkoEýraziia qaýymdastyǵynyń uiymdastyrýymen «Maǵjan Jumabaev - Túrkistannan Anadolýǵa» atty jiyn ótti, dep habarlaidy "Ult aqparat".
Qazaqctannyń tabiǵi kórkemdigin sýretteitin kórmemen bastalǵan atalmysh sharaǵa Qazaqstannyń Túrkiiadaǵy Elshisi Abzal Saparbekuly, Túrkiia Uly Ulttyq Májilisiniń depýtaty, burynǵy premer-ministrdiń orynbasary Iyldyrym Týǵrýl Túrkesh, Kechioren mýnitsipalitetiniń meri Turǵyt Altynok, Ahmet Iasaýi atyndaǵy Qazaq-túrik ýniversiteti ókiletti keńesiniń tóraǵasy professor Musa Iyldyz, EkoEýraziia tóraǵasy Hikmet Eren, Eýraziia jazýshylar odaǵynyń tóraǵasy Iakýp Ómeroǵlý jáne aqyn-jazýshy Áli Akbash, Ankara Hadjy Bairam Ýáli ýniversitetiniń oqytýshysy professor Hýliia Hasapoǵlý Chengel, ǵalymdar men ziialy qaýym ókilderi, kásipkerler, Túrkiiada bilim alyp jatqan qazaqstandyq stýdentter men BAQ ókilderi qatysty.
Is-shara EkoEýraziia qaýymdastyǵynyń tóraǵasy Hikmet Erenniń alǵy sózimen ashyldy. Hikmet Eren Maǵjan shyǵarmalaryndaǵy oilardyń mańyzdylyǵyn jáne qazirgi tańdaǵy da ózektiligin atap ótti. Óz sózinde, Alash qozǵalysynyń qairatkeri, qazaqtyń uly ziialysy, túrki álemine ortaq aqyn, Túrkistannyń kórnekti ókili sanalatyn aqyn Maǵjannyń ondaǵan jyl boiy qýǵynda jáne túrmelerde ómir súrýge májbúr bolǵandyǵyn atai otyryp, onyń shyǵarmalary men oilary máńgi este saqtalatyndyǵyn atap ótti. Hikmet Eren, Maǵjannyń túrki halyqtarynyń tegi bir tutastyǵy men birligi týraly oilarynyń astyn syzyp, sózin Ziia Gokáliptiń «Otan degenimiz túrikterge Túrkiia emes, Túrkistan emes otanymyz, baitaq jáne birge máńgi ómir súretin elimiz ol – Turan» dep jalǵastyrdy.
Qazaqstannyń Túrkiiadaǵy Elshisi Abzal Saparbekuly qazaq halqynyń kórnekti ókili, memlekettik qairatker, jaryq juldyz-aqyny Maǵjan Jumabaevtyń «Túrkistan», «Alystaǵy baýyryma», «Jer júzinde», «Paiǵambar» óleńderine nazar aýdara otyryp, túrki halyqtarynyń tegi bir tutastyǵy men birligin jalyndy júregimen jyrlaǵan tulǵa ekendigin atap ótti.
«Ult júreginiń simvoly ispetti Maǵjannyń oiy da, sózi de, ottai mazdaǵan, qorǵasynnan quiǵandai kesek-kesek» dep, aqynnyń «Biz aityp júrgen shyǵarmashyl intelligentsiiaǵa shyndyq pen týrashyldyq jetpeidi, al shyndyq pen aqiqat bolmaǵan jerde, erkindik pen táýelsizdik bolmaidy. Biz jalǵan dúnieni ózimiz jazǵanymyzben qoimai, jurtty soǵan úiretip jatyrmyz. Jalǵan nárse jarǵa jyǵady, ótirik eshkimge abyroi ápermeidi. Eń qaýiptisi – arsyzdyq. Eger ulttyń ar-ojdany saqtalsa, ondai halyq pen ultqa myna álemde eshqandai da qaýip tónbeidi» sózin mysalǵa keltirdi. Sondai-aq, Qazaqstan Elshisi aqynnyń óleń joldaryndaǵy filosofiialyq-psihologiialyq sipattarǵa kemeldigimen ózgeshelenetindigin basa aitty. «Túrik balasy óziniń ata-babasyn bilgen saiyn úlken isterge kúsh salady» dep Atatúriktiń sózinen úzindi aitqan Elshi, túrki halyqtarynyń birligi úshin janyn pida etken tulǵanyń túrik elinde de keńinen tanystyrylýy kerek ekendigine toqtala otyryp, «Maǵjan qalamymen túrki halyqtaryn bir shańyraq astyna jinady», dedi Elshi A.Saparbekuly.
Atalmysh shara Túrik tili uiymy ǵylymi komitetiniń múshesi, Ankara Hajy Bairam Veli ýniversitetiniń aǵa oqytýshysy, professor Hýliia Kasapoǵlý Chengeldiń Maǵjan Jumabaevqa arnalǵan keń kólemdi baiandama jasady.
«Rýhani jańǵyrý» baǵdarlamasy aiasynda Qazaqstanda rýhani qundylyqtarymyzdyń qaita jandanyp kele jatqandyǵyna toqtalyp, qazirgi qazaq ádebietindegi lirizm jáne de bul aǵymnyń Maǵjan Jumabaevpen bastalǵandyǵyn atap ótti. Sonymen qatar, Álihan Bókeihan bastatqan Alash qozǵalysynyń mańyzdylyǵy týraly sóz qozǵady. Maǵjannyń Alash qozǵalysynyń qairatkeri retinde, qazaq halqynyń táýelsizdigi men bostandyǵy úshin kúreskendigin tilge tiek etti. Hýliia Kasapoǵlý Chengel Maǵjan Jumabaevtyń óleńderiniń ereksheligine toqtaldy. Baiandamasynda, Maǵjan men túrik aqyndarynyń óleńderin salystyryp, uqsastyqtaryna taldaý jasady.
Baǵdarlama sońynda qazaq jáne túrik jastary uly aqynnyń óleńderin jatqa oqyp, kórermenniń ystyq yqylasyna bólendi.
Is-sharadan keiin uly aqyn Maǵjannyń óleń-shyǵarmalaryn túrik tiline aýdarǵan aqyn Áli Akbash shyǵarǵan «Alystaǵy baýyryma» kitaby avtor qoltańbasymen taratyldy.
