Foto: Úkimet
Úkimet otyrysynda Tsifrlyq damý, innovatsiialar jáne aeroǵarysh ónerkásibi ministri Jaslan Mádiev mal sharýashylyǵyn zamanaýi tehnologiialar arqyly jańǵyrtýdyń keshendi josparyn tanystyrdy, dep habarlaidy Ult.kz.
Ministrdiń aitýynsha, bul protseste janýarlar ál-aýqaty – animal welfare standarttaryn saqtaý basty basymdyqtardyń biri bolmaq.
Eurotier 2024 málimetteri janýarlarǵa jaily jaǵdai jasalǵan fermalarda ólim-jitim azaiyp, ónim sapasy men tabys artady degen qorytyndyny dáleldedi. Osyǵan bailanysty, Qazaqstanda da jeldetý, jyly edender, mýzyka oinaý, tasymaldaý kezindegi stressti azaitý sekildi jailylyqty arttyratyn júieler engiziledi. Sondai-aq, fermalardyń qurylymy janýarlardyń biologiialyq minez-qulqyna beiimdeletin bolady.
Mal sharýashylyǵyn basqarýdyń tiimdiligin arttyrý maqsatynda mal men veterinariiaǵa qatysty barlyq derekti biryńǵai aqparattyq júiege shoǵyrlandyrý usynylyp otyr. Bul – sharýashylyqtardan bastap, ministrlikke deiin úzdiksiz esep júrgizýge, jedel sheshim qabyldaýǵa jáne keshendi taldaý jasaýǵa múmkindik beredi.
Budan bólek, smart-fermalar tujyrymdamasy aiasynda robottandyrylǵan júieler keńinen qoldanylady. Atap aitqanda, avtomattandyrylǵan saýý, azyqtandyrý, klimatty basqarý, beinebaqylaý men janýarlar densaýlyǵyn qadaǵalaityn datchikter engiziledi. Bul qurylǵylardan alynǵan barlyq málimet biryńǵai veterinariialyq bazaǵa túsip, árbir maldyń tsifrlyq profilin jasaýǵa kómektesedi.
Mal sharýashylyǵynyń tsifrlyq transformatsiiasy janýarlarǵa jaily jaǵdai jasaýmen qatar, óndiris tiimdiligi men ónim sapasyn arttyrýǵa, veterinariialyq qaýipsizdikti kúsheitýge baǵyttalǵan.
