«Alternativa» ózekti zertteýler ortalyǵynyń direktory Andrei Chebotarev sailaý protsesine qatysyp jatqan saiasi partiialardyń belsendiligine qatysty pikir bildirdi, dep habarlaidy QazAqparat.
«Parlamenttik jáne jergilikti sailaýlarǵa elimizde resmi tirkelgen 6 saiasi partiianyń 5-eýi qatysyp jatqany belgili. Jalǵyz oppozitsiialyq partiia – Jalpyulttyq sotsial-demokratiialyq partiia sailaýǵa qatysýdan bas tartty. Osyǵan bailanysty sarapshylyq jáne media ortada «sailaýǵa oppozitsiia qatyspasa, demek onda báseke, tipti zańdy bolmaidy» degen pikirtalas júrip jatyr. Bul oraida pikirtalastyrýǵa da bolady. Óitkeni, ótken jyly «Qazaqstan-2050» demokratiialyq kúshter koalitsiiasy taratyldy. Bul koalitsiia «Nur Otan» partiiasy janynda jumys istedi jáne oǵan búginde sailaýǵa qatysyp jatqan barlyq saiasi partiialar kirdi. Mundai koalitsiianyń sailaýǵa deiin óz jumysyn toqtatýy da atalǵan partiialardy áleýettik seriktester, saiasi odaqtastar retinde bailanystyrmaityndyǵyn bildiredi. Árkim ózi úshin kúresedi», - dedi ol Qazaqstandaǵy sailaýǵa qatysty uiymdastyrylǵan dóńgelek ústel barysynda.
Onyń atap ótýinshe, saiasi partiialar parlamenttik, sonymen qatar máslihattar sailaýyna da belsendi qatysyp jatyr.
«Nur Otan» partiiasy kóshbasshysy Elbasy Nursultan Nazarbaev belgilep bergen óziniń baǵarlamalyq baǵytynan taimai kele jatqanyn kórip otyrmyz. Parlamenttik «Aq jol» men «Qazaqstannyń halyq partiiasy» jáne parlamenttik emes «Adal» men «Aýyl» partiialary da belsendi. «Adal» partiiasy kóptegen baiqaýshylardy tań qaldyryp, sailaý protsesinde alǵa umtylyp shyqty. Buryn «Birlik» partiiasy bolǵan kezinde eshqandai qyzmetin júrgizbegen, naqty kózqarasyn bildirmegen edi. Tek 2016 jylǵy parlamenttik sailaýǵa qatysqany bolmasa», - dedi sarapshy.
Andrei Chebotarovtyń aitýynsha, «Aq jol», «Qazaqstannyń halyq partiiasy» jáne «Aýyl» partiiasy sailaýaldy úgit jumystaryn qarqyndy júrgizýde.
