Ulttyq mýzeide "Resei-Qazaqstan - ǵaryshtyq dáýirdi tuńǵysh ashqandar" atty poshta markalarynyń kórmesi ashyldy, dep habarlaidy Sputnik.
Kórmege shahmattan birneshe dúrkin álem chempiony, RF memlekettik dýmasynyń halyqaralyq ister jónindegi komitetiniń tóraǵasy Anatolii Karpovtyń jeke kollektsiiasyndaǵy sirek markalar qoiylǵan.
Bul ekspozitsiia úshin áigili shahmatshy Ǵarysh kúnine arnalǵan 98 erekshe markasyn iriktep ákelipti.
"Men óz kollektsiiamdy Qazaqstanǵa alǵash ret ákelip otyrmyn. Munda ǵaryshkerler, ǵarysh apparattary men belgili ǵalymdar beinelengen. Men olardyń qoltańbalary bar markalardy arnaiy iriktep aldym. Ǵarysh – ushy-qiyry joq taqyryp. Sondyqtan bul kórmege tiianaqty daiyndalǵanymyzǵa qaramastan, bul kollektsiiamnyń óte az bóligi ǵana", - dedi Anatolii Karpov.
Kórme ashylmas buryn Karpov ekspozitsiiany ózi aralap, daiyndyqty tekserdi. Ol kórmeniń jaqsy uiymdastyrylǵanyn atap ótti.
Kórmege qyzyǵýshylyq tanytqandar az bolmady. Ashylý saltanatyna jas shahmatshylar kóptep keldi. Olar uzyn-sonar kezekte turyp, aqyry, Anatolii Karpovtyń qoltańbasyn alyp qaitty.
Saltanatty jiynda Reseidiń Qazaqstandaǵy elshisi Aleksei Borodavkin sóz sóiledi.
"Kórmege qoiylǵan ár marka Resei men Qazaqstannyń ǵarysh tarihymen bailanysty. Astanalyqtar Anatolii Karpovtyń sirek markalar kollektsiiasyna joǵary baǵa beredi degen senimdemin. Bul kórme Qazaqstan men Resei arasyndaǵy áriptestiktiń damýynyń dáleli bola alady. Qazaqstan bizdiń odaqtasymyz ári seriktesimiz",- dedi Resei elshisi.
Eske sala ketsek, kórme halyqaralyq "Rossiiskie kýltýrnye sezony" festivali aiasynda ótip otyr. Reseidiń ǵylym jáne mádeniet ortalyǵy, Qazaqstannyń ulttyq mýzeii men "Roskosmos" birlese uiymdastyrǵan.
Ekspozitsiia kelýshilerdi 17 mamyrǵa deiin qýantady.
