Óz anasyn soqqyǵa jyqqan elorda turǵyny 10 táýlikke qamaýǵa alyndy, dep habarlaidy "Ult aqparat" Nur-Sultan qalasy politsiia departamentine silteme jasap.
«Ýchaske» jedel-aldyn alý sharasyn ótkizý barysynda Nur-Sultan qalasy Baiqońyr aýdanynyń politsiia basqarmasy ýchaskelik inspektoryna 54 jastaǵy áiel kelip, balasynyń ishimdik iship, ony soqqyǵa jyqqanyn shaǵymdanyp aitty.
Atalǵan faktimen sot-meditsinalyq saraptama taǵaiyndaldy. Onyń qorytyndylary boiynsha «Densaýlyqtyń qysqamerzimdi nasharlaýy nemese jalpy eńbekke jaramdylyqtyń aitqysyz joiylýyna ákelip soqtyrǵan densaýlyqqa qasaqana jeńil ziian tigizý» babynyń 1-bólimimen ákimshilik óndiris qozǵaldy.
Aýdanaralyq ákimshilik sot sýdiasynyń qaýlysymen 31 jastaǵy er adamǵa 10 táýlikke qamaýǵa alý túrindegi jaza taǵaiyndaldy. Budan basqa, quqyq buzýshynyń tártibi 1 jyl merzimde qatań baqylaýǵa alynady.
Elordada «Ýchaske» is-sharasy ótip jatyr. Onyń maqsaty – qylmys pen zań buzýshylyqtyń aldyn alý jáne boldyrmaý boiynsha túsindirý jumysyn júrgizý.
Shara kezinde ýchaskelik inspektorlar 223 myńnan astam páter men 27 myńnan astam jeke úidi aralap shyqty. Ishki ister bóliminde esepte turǵan 13 277 tulǵanyń turǵylyqty orny tekserildi. Budan basqa, jalǵa berilip júrgen 2 800-den astam páter anyqtalǵan.
