Foto: Instagram.com
Tanymal bloger Aisáýle Baqytbek ákesimen qarym-qatynasynyń qandai deńgeide ekenin aitty, dep habarlaidy Ult.kz saity Stan.kz-ke silteme jasap.
Bul týraly ol Zamandas podkastynda aitty.
Jeli juldyzy ózin salt-dástúrdi ustanatyn otbasynda tárbie alǵanyn jetkizdi.
"Ata-anamnyń oqiǵasynan eki ai buryn Álishermen eki jaqqa ketken edik. Ol kezde birge bola almaitynymyzdy túsindik. Qatty stress alyp, kúizeliste júrgen edim. Múmkin ýaqyt kerek bolǵan shyǵar?! Biraq men ata-anamnyń kózimizshe sózge kelip, urysqanyn kórmeppin. Sińilim Aiarý da kórmegen. Ata-ájemizdiń qolynda óstik. Olar 80-jyldardaǵy adamdar bolǵasyn bir-birine daýys kóteretin. Ol oqiǵa meni qatty eseitip jiberdi. Amerikaǵa ketemin dep bilet alyp qoiǵan edim. Biraq tórt aidan keiin ǵana jolym tústi. Anamdy soqqyǵa jyqqanda birden Álisherdi izdedim. Anamdy aýrýhanaǵa, ákemdi túrmege alyp ketti. Men ákemniń janynda qalyp, Álishermen sóilestim. Ol birden meni jubatýǵa tyrysty. Qasyma keletinin aityp, kóńilimdi aýlady. Sol jyly meniń ómir súrý rejimim kúrt ózgerdi. Tórt ai boiy aýrýhana men túrmeniń ortasynda júrdim. Tańerteń túrmege baramyn, túste aýrýhanaǵa anamnyń janyna kelemin. Álisher janymda boldy, biraq Amerikaǵa ketetin ýaqyty jaqyndaǵasyn ol ushyp ketti. Sodan keiin oilana bastadym. Qyrkúiekte men de bárin tastap, Amerikaǵa ketip qaldym. Ol kezde jaǵdai da turaqtalǵan edi", – dedi bloger.
Aisáýleniń sózinshe, búginde qyzdary ákesimen aralasyp turatynyn jasyrmady.
"Qyzdarym “Baqytbek ata kele me?” dep izdep turady. Atalaryn jaqsy kóredi. Aralasyp turamyz. Anam áýelden ákemizden ajyratqan joq. Bizdiń aralasyp turýymyzdy talap etedi. Osy oqiǵadan keiin psihologpen jumys istedik. Túrmede otyrǵanda da ákeme baryp turdym. Biraq men ony jurtqa qalai jetkizerimdi bilmedim. “Ákemmen sóilesip jatyrmyn” desem, “Anańdy óltire jazdaǵan adamdy qoldaisyń” dep aitady. Men onyń isin qoldamaimyn. Ákemdi nemerelerinen aiyra almaimyn", – dedi Aisáýle.
