Kóktem aiynyń alǵashqy merekesi 8 naýryz da esik qaǵyp tur. Osynaý merekege orai ana týraly óleńder toptamasyn usynamyz. Qabyl alyńyzdar!
Mama
Men seni Táńirden suradym, mama,
Osy arýdyń qursaǵyna bitemin dep.
Men sen úshin talai jyladym, mama,
Aqynnyń anasy bop ótedi dep.
Men seni jubata almaimyn, mama,
Araily bir tańyń atady dep.
Men bul ómirdi unata almaimyn, mama,
Qabyrǵama bar muńy batady kep.
Men ómirdi sonda da súiippin, mama,
Syzdaidy tek ishte, jaram ǵana.
Men bar muńnan biikpin, mama,
Men úshin alańdama!
Bul ómirde qai aqyn jaryǵan, mama?
Júrgen soń taǵdyrdyń ótinde kóp.
Bar bolmysym ózińnen daryǵan, mama,
Sen ǵaryshty týǵanyńa ókinbe tek.
Sen meni qazaqqa syiladyń, mama,
Ǵajaptardan qaǵylsań da.
Men seni azapqa qimadym, mama,
Qansha jyl saǵynsam da.
Áitpese, bilseń ǵoi, janym, mama,
Ishim meniń – sheksiz álem.
Bul meniń sorym ári baǵym, mama,
Janarymdaǵy óksik óleń.
Ishim meniń gúlderge toly ǵoi, mama,
Nurǵa da toly júregim aq.
Bizdiń taǵdyr – azap joly ǵoi, mama,
Áiteýir tilegim aq.
Ákem – Táńir, óziń – Umaisyń, mama,
Al, men – Qudaidyń balasymyn.
Sen báribir maǵan unaisyń, mama,
Kózimdegi qarashyǵym..!
Aqberen Elgezek
Ana jaily eń jaqsy sóz...
"Əke, əke, sen aitatyn jaqsy sózder kóp edi,
Aitshy endi, ana jaily eń jaqsy sóz ne?" dedi,
Ana jaily...
Ana jaily paiǵambarlar səlemi,
Ana jaily aqyndardyń óleńi.
Ana jaily - qara jerdiń tózgeni,
Ana jaily - ýaqyttyń bezbeni,
Ana jaily aitylmaǵan bir sóz bolsa əlemde,
Ol da ananyń aita almaǵan sózderi.
Ana jaily jaqsy sózdi estý úshin tyńda, ulym,
Tynyshtyqty,
Taýdy,
Kóldi,
Ai səýlesin,
Kún nuryn,
Ana jaily seniń tətti qiialdaryń, armanyń,
Ana jaily meniń barlyq shyndyǵym.
Men aitatyn jaqsy sózder kóp edi,
Men de anamdy jaqsy kórem, sebebi!
Bilesiń be, bul əlemge adamdar,
Ana jaily aitý úshin keledi!
Adamzattyń eń bir asqaq bar əni,
Jyr etkemen, pir etkenmen anany,
Bul ómirdi qalai súrip ótkeni -
Ana jaily aitqan sózi bolady.
Ana jaily - keń dúnie - besigiń,
Ana jaily amanat pen keshirim,
Anań úshin eń jaqsy sóz dúniede -
Ulym, seniń esimiń!..
Erlan JÚNIS
***
Asyl ana! Túsimde kórem seni,
Burynǵydai emessiń nege eńseli?
Men bilsem, saǵan degen saǵynyshtyń,
Osynaý jumyr jerde joq ólshemi.
Terbep sol saǵynyshtyń kúshti yrǵaǵy,
Eljirep elesińdi qushtym taǵy.
Hat bailap qanatyna jiberer em,
Barmaidy-aý, bizdiń jaqqa qustyń bári.
Ne taptym, belden ketip betegeli?!
Qalaǵa qańǵybas oi jeteledi.
Jaquttap jazý úshin osy óleńdi,
On jyldyq bilimim de jeter edi.
Dúnie shyr ainalyp sharainadai,
Jolyma qala berdiń qarai-qarai.
Qaiyrymsyz qalaǵa, meiirimdi,
Qaldyryp kete bergem qalai ǵana-ai?!
Al, búgin aqyn boldy aqyldy ulyń,
Janymdy jegidei jep jatyr muńym.
Ardaqtap arnamasam saǵan óleń,
Adyra qalatyndai aqyndyǵym.
Bilmeimin, bul qaladan baq tabam ba?
Jabyǵyp júrgendeimin jat ǵalamda.
...Tarylǵan kósheleri tas qaladan,
Tarydai bir meiirim tappaǵanda,
Seni saǵynyp ketem, anashym!
Qalqaman Sarin
Ana
Aqylmyn. Armyn. Júrekpin. Oimyn.
Osynyń bárin seziný ǵoi – muń.
Daýyldatsa da, quiyndatsa da,
Men Jerge múldem renjýdi qoidym.
Óitkeni, onda sen barsyń, Ana!
Qatigezdikten qaimyqqan órlik,
Balbal tastardan oidy uqqam sendik.
O, seni jylap turyp ta súiem
Sory kóp bizdiń boilyq pen endik.
Óitkeni, onda sen barsyń, Ana!
Aidynym. Taýym. Ormanym. Tasym.
Bári de –asyl, bári de – asyl.
Ornaidy túbi bul mekenge baq
Solardyń jasy qurǵatylǵasyn.
Óitkeni, onda sen barsyń, Ana!
Qaptasa-daǵy jer betin qaýip,
Ketse de barlyq adamdyq aýyp.
Sonda da myna ǵasyrdy tastap
Eshqaida meniń ketpesim anyq
Óitkeni, munda sen barsyń, Ana!
Maqpal Jumabai
Apamnyń monologi
Qulynym-aý,
Tirisińbe kelshi úige.
Ulan-asyr toi bop jatyr kórshi úide.
Iir-qiyr joldar jatyr joǵalyp,
Qasirttei qara taý tur melshigen.
Surai-surai men olardan jalyqqam,
Qustyń úni qýantpaidy talyqqan.
Kóktem saiyn kókke qarap júrýshi em,
«ShAǴANǴOLǴA» shashylǵanda mamyq tań.
Qustyń úni qýantpaidy aqqýlar,
Jyly jaqqa jyljyp ketken aq qyzdar.
Qyz minezdi qystyń saiqal tósinde,
Altai jaily ańyz aityp jattyń ba?
Qulynym-aý,
Saǵyndym ǵoi,kelshi úige,
Ulan-asyr toi bop jatyr kórshi úide,
Tómen qarap ótti álsiz jymiyp,
Bálkim sol qyz sen súigen.
Ol da ańsaidy-aý,kórgisi kep kóp oilap,
Men siiaqty meńdep júrgen o,beibaq.
Kúldir-kúldir kisineisiń túsimde,
Buldyr-buldyr úniń jeter jel aidap.
Sen túsimde janaryńa jas tolyp,
Júresiń ǵoi bir aqylsyz basqa erip.
Qasietti jerden kórem qaiteiin,
Tursyń ýdai mas bolyp.
Qulynym-aý,
Sen ómirge kelgende,
Ábilhaiat ana sútin emgende,
Boiyńdaǵy bilep júrgen jyndardan
Al basqasyn bergem men.
Qulynym-aý,
Qulynym-aý,Qulynym,
Jaqsylyqtyń jasap júrmin yrymyn.
Erteń taǵy qarap turam joldarǵa,
Kózin syǵyp kúmiljidi búginim.
Yrysbek Dábei
