Foto: HALYQSTAN
Aljir azamaty Sarah Tazekrittiń Qazaqstandaǵy oqiǵasy bastapqyda qarapaiym sapar retinde bastalyp, aqyrynda otbasynyń ajyraý qaýpine ákelgen sot daýyna ulasty, dep habarlaidy Ult.kz HALYQSTAN telegram arnasyna silteme jasap.
Tazekrit elge týristik vizamen, Qazaqstanda investorlyq viza arqyly jumys isteitin kásipker kúieýimen birge kelgen.
Onyń elde bolý merzimi 2025 jylǵy 14 qazanda aiaqtalýy tiis edi. Alaida dál sol kúni ol zań talaptary men adamnyń tabiǵi fiziologiiasy tikelei qaishylyqqa túsken jaǵdaiǵa tap boldy: áiel júktiliktiń sońǵy kezeńinde bolyp, tolǵaǵy bastalǵan.
16 qazanda ol Astanadaǵy aýrýhanalardyń birinde bosandy.
Osy sátten bastap onyń elden shyǵýy qiyn ǵana emes, is júzinde múmkin bolmai qaldy.
Sebebi qoldanystaǵy aviatsiialyq erejelerge sáikes, júktiliktiń sońǵy kezeńindegi áielderge ushýǵa ruqsat berilmeidi, al jańa týǵan náresteler men bosanǵan analarǵa alǵashqy kúnderi ushýǵa bolmaidy.
Sonymen qatar bul jaǵdaida taǵy bir biýrokratiialyq kedergi týyndady: náresteniń elden shyǵýyna qajetti qujattary bolmady.
Olardy rásimdeý úshin otbasy Qazaqstanda týý týraly kýálik alýdan bastap, Aljirdiń diplomatiialyq organdarymen bailanys ornatýǵa deiin birqatar rásimderden ótýge májbúr boldy.
Jaǵdaidy Aljir elshiliginiń Astanada sol kezde jumys istemeýi qiyndatty, sondyqtan otbasy Ózbekstanǵa barýǵa týra kelegen. Sonyń saldarynan qujattardy rásimdeý birneshe aiǵa sozyldy.
Osy jaǵdailardyń bárine qaramastan, 2026 jyldyń naýryzynda Qazaqstan soty Tazekritti kóshi-qon zańnamasyn buzdy dep tanyp, eń qatań jaza — ákimshilik jolmen elden shyǵarý jáne keiin elge kirýge tyiym salý sheshimin shyǵardy.
«Iá, otbasynyń áreketterinde belgili bir salǵyrttyq bolǵanyn joqqa shyǵarýǵa bolmaidy. Biraq áieldiń elden shyǵýdan ádeii jaltarý nieti bolmaǵany anyq. Onyń ústine, bul – asa qajettilik jaǵdaiy, munda formaldy talaptardy saqtaý ana men balanyń densaýlyǵyna tikelei qaýip tóndirýi múmkin edi», — deidi Astana advokattar alqasynyń advokaty Altynbek Aitymbetov.
Ol sondai-aq birqatar protsessýaldyq buzýshylyqtardy atap ótedi: birinshi satydaǵy sotta tolyqqandy qorǵanýdyń bolmaýynan bastap, istiń barlyq mán-jaiynyń tolyq zerttelmeýine deiin.
Degenmen eń mańyzdy másele — balanyń jaǵdaiy. Ol Qazaqstanda dúniege kelgenimen, sot sheshimderi qabyldanǵan sátte onyń elden shyǵýyna qajetti qujattary áli rásimdelmegen bolatyn.
Qazirgi jaǵdaida, eger Sarah deportatsiialansa, ol bes jyl boiy Qazaqstanǵa qaita kire almaidy.
Teoriialyq turǵyda sábi ákesimen birge Qazaqstanda qalýy múmkin. Biraq eger qandai da bir sebeptermen ákesi de deportatsiialansa...
Apelliatsiialyq instantsiia sheshimdi ózgerissiz qaldyrǵannan keiin, qorǵaý tarapy isti qaita qaraý talabymen Bas prokýratýraǵa júgindi. Ótinishte bul sheshimdi oryndaý bala úshin «aýyr, qaitymsyz saldarǵa» ákelýi múmkin ekeni ashyq aitylǵan.
«Búgin biz birinshi sot sheshimin ózgerissiz qaldyrý týraly qaýly aldyq. Iaǵni Sarah Tazekrit 10 kún ishinde Qazaqstannan ketýi tiis. Endi bar úmit — kassatsiialyq sotta. Sol jerde isti tereńirek, jan-jaqty qaraidy dep úmittenemiz», — deidi advokat.
Aita keterligi, bul jaǵdai bastapqyda qarapaiym aiyppulmen-aq sheshilýi múmkin edi — zań buǵan tolyq múmkindik beredi.
