Máskeý túbinde apatqa ushyraǵan An-148 ushaǵynda bolǵan barlyq jolaýshylar men ekipaj músheleriniń aty-jónderi anyqtaldy. Olardyń tizimi Resei Federatsiiasy Tótenshe jaǵdailar ministrliginiń resmi saitynda ornalastyryldy. Ajal qushqan jolaýshylardyń úsheýi - balalar, dep jazady Ult.kz tilshisi QazAqparat agenttigine silteme jasap.
Buǵan deiin habarlaǵanymyzdai, búgin Máskeýdiń Domodedovo áýejaiynan kókke kóterilgen An-148 jolaýshylar ushaǵy kóp uzamai radardan joǵalyp ketti. Keiin ushaq qaldyqtary Máskeý oblysynyń Ramensk aýdanynda tabylǵany málim etildi. «Saratov áýe jelileri» kompaniiasyna tiesili ushaqtyń bortynda 65 jolaýshy men 6 ekipaj múshesi boldy. Olardyń barlyǵy ajal qushty.
TASS agenttiginiń «Saratov áýe jelileri» kompaniiasyna silteme jasap habarlaýynsha, qaza bolǵan adamdardyń týystaryna shuǵyl kómek retinde 100 myń rýblden tólenedi.
«100 myń rýbl kólemindegi shuǵyl kómekti alý úshin kóz jumǵandardyń týǵan-týystary "AlfaSaqtandyrý» AQ-ǵa júgine alady», - delingen kompaniia aqparatynda.
Áýe kemesi apatqa ushyraǵan orynda 150-den astam adam men 20 tehnika jumys isteýde. TJM basshysy Vladimir Pýchkovtyń aitýynsha, qutqarý jumystary táýlik boiy júrgiziletin bolady.
Apatqa ne sebep bolǵandyǵyna qatysty resmi aqparat joq. Tergeý komiteti qaiǵyly oqiǵa aýa raiynyń nasharlaýy, ekipajdyń qateligi, sondai-aq tehnikalyq aqaý saldarynan bolýy múmkindigin aitýda. Ázirge, oqiǵa ornynan bir qara jáshik tabyldy.
«Domodedovo - Orsk» reisin oryndaǵan An-148 ushaǵynyń apatqa ushyraý faktisi boiynsha «Abaisyzda sońy eki nemese odan kóp adamnyń ólimine alyp kelgen áýe kóligin paidalaný jáne qozǵalys qaýipsizdigi erejelerin buzý» babymen qylmystyq is qozǵaldy. Is Tergeý komitetiniń ortalyq apparatyna berildi.
Resei prezidenti Vladimir Pýtin adamdardyń qaza bolýyna orai kóńil aityp, úkimettik komissiia qurýdy tapsyrdy.
Osy ýaqytta Qazaqstannyń Syrtqy ister ministrligi qaza bolǵandardyń arasynda elimiz azamattarynyń bar-joǵyn anyqtaýda.
