18 qańtarǵa qaraǵan túni halyqaralyq Amnesty International uiymy Aleksei Navalnyidy ar-ujdan tutqyny dep atap, Máskeýden ony dereý bosatýdy talap etti, dep jazady Azattyq.
"Resei biligi Navalnyiǵa qarsy joiqyn naýqan júrgizip otyr. Olar Berlinnen Máskeýdiń "Sheremetevo" áýejaiyna kelip, sanaýly minýttan soń ustalǵan tanymal Kreml synshysy Aleksei Navalnyidy tez arada bosatýy qajet" dep jazdy uiym Twitter-paraqshasynda.
Reseidiń oppozitsiialyq saiasatkeri ótken jyldyń tamyzynda Tomskiden Máskeýge jol tartqan ushaqta háli kúrt nasharlap, esinen tanǵan. Ushaq ekipajy shuǵyl túrde Omby qalasyna qonyp, sol jerden ony jedel járdem qyzmeti jergilikti aýrýhanǵa alyp ketken. Eki kúnnen soń ol es-tússiz kúii Germaniiaǵa jetkizilgen. Qyrkúiektiń basynda Germaniia úkimeti Navalnyidyń denensinen "Novichok" ýynyń izin anyqtaǵan. Keiinirek táýelsiz zerthanalar saiasatkerden alynǵan úlgide ýdyń baryn rastaǵan.
17 qańtar kúni Navalnyi jary Iýliiamen, baspasóz hatshysy Kira Iarmysh, zańgeri Olga Mihailova jáne kóptegen jýrnalistpen birge Berlinnen Máskeýge ushqan. Áýeli "Vnýkovo" áýejaiyna qonýy kerek bolǵan ushaq qonýǵa jaqyn qalǵanda kenet "Sheremetevo" áýejaiyna jol tartqan. Áýejaidyń keden qyzmetinen óter sátte ony politsiia ustap áketti. Quqyq qorǵaý organdary zańgeriniń qarsylyǵyna qaramastan Navalnyidyń bir ózin ǵana alyp ketti.
"Aleksei Navalnyidy ustaǵany Resei biligi onyń aýzyn japqysy keletinin odan ári dáleldep otyr" deidi Amnesty International uiymy Máskeý ókildiginiń direktory Natalia Zviagina uiymnyń baspasóz habarlamasynda.
Navalnyidyń qamalýy FSB agentteri joǵarydan túsken buiryq negizinde ýlady degendi tergeý qajettiligin nyqtai tústi deidi Zviagina.
Zviaginanyń sózinshe, sondai-aq Jazany oryndaý jónindegi federaldyq qyzmettiń Germaniiada emdelip jatqan Navalnyidan dereý oralýyn talap etip, bolmasa túrmege qamalatynyn aityp ýltimatým qoiýy biliktiń saiasatkerge qarsy joiqyn naýqan júrgizip otyrǵanyn kórsetedi.
"Bilik Aleksei Navalnyidyń kelýin qaýipsizdikti qamtamasyz etý jónindegi tolyqqandy operatsiiasy retinde qarap, "Vnýkovo" áýejaiyna júzdegen politsei tartyldy. Aýa temperatýrasy – 20 gradýs kezinde Navalnyi jaqtastary ysyrylyp, qamaýǵa alynyp jatty. Onymen qoimai, reistiń ózge áýejaiǵa – "Sheremetevoǵa" burdy" deidi ol.
"Aleksei Navalnyi saiasi belsendilikke degen quqyǵynan jáne sóz erkindigi quqyǵynan aiyryldy. Amnesty International ony ar-ujdan tutqyny dep qarastyrady jáne ony eshqandai shartsyz dereý bosatýdy talap etedi" delingen uiymnyń baspasóz habarlamasynda.
