Belgili aqyndar Maraltai Raiymbekuly, Jaras Sársek, Erlan Júnis jazýshy Júsipbek Qorǵasbektiń baǵdarlamasyna kelip, aqyn Ámirhan Balqybek týraly syrlarymen bólisti, – dep habarlaidy «Ult aqparat».
Qalamger Júsipbek Qorǵasbektiń aitýynsha, Ámirhan týraly áńgime kóp, ańyz da bola bastaǵan. «Ámirhannyń «Bas» degen óleńi bar. Men ózim Ámirhannyń taǵdyryna bailanysty, osy óleńniń keiipkeri de, jendet te Ámirhannyń ózi me dep oilap qaldym. Áńgimemizdi Ámirhannyń taǵdyrynan bastasaq...» deidi jazýshy.
Aqynda, jalpy óner adamynda bolashaqty óziniń taǵdyryn boljaý deitin bir dúnie bar ekenin aitqan Maraltai Raiymbekuly Ámirhanmen kórshi turǵanyn aityp, ony únemi oilaitynyn jetkizdi.
«Aqynda, jalpy óner adamynda bolashaqty óziniń taǵdyryn boljaý deitin bir dúnie bar. Ol shyndyqtan alys ketpeidi. Biraq men osy Ámirhannyń basyndaǵy kók tasyna epitafiia tańdaǵan kezde, osy Jaras bar, jaqyn júrgen azamattar bar, biz kóptegen óleńderiniń ishinen súzip alyp, eki jol, bir shýmaq óleńdi izdedik. Sol kezde bizdiń kózimizge túsken jalǵyz shýmaq:
Sýyǵy ótsin jahannyń jaýyrynan,
Ymyrasyz yqpasam daýylynan.
Bilem qaza bolsa ol tabiǵattan,
Dinim tip-tik turǵany tamyrynan, - deidi. Óziniń taǵdyryn óziniń jyrlarynda boljady. Óziniń shyǵarmasynda izdengen baqtaryndaǵy, ózinen buryn ómir súrgen álem ádebietindegi uly tulǵalardyń taǵdyrynan izdedi me dep oilaimyn.
Men Ámirhannan buryn óleń oqysam, ol menen keiin óleń oqysa, Ámirhan menen asyp túsip oqyǵysy keletin. Men de kerisinshe Ámirhannan keiin oqysam, odan asyp túskim keletin. Aýditoriiany ózime baýraǵym keletin. Bul ózi solai bolýy tiis nárse ǵoi. Aqyn sondai bolý kerek. Sosyn Ámirhan tanymdyq maqalalarǵa kóp bardy ǵoi, myna túrki álemine, basqa álemge ártúrli formalarǵa barlaýǵa barady da, sol maqalany jazatyn kezde sol baǵytty tereńdetip biletin adamdarmen telefonmen sóilesedi nemese baryp sóilesedi. Solarmen ortaq bir sheshimge keledi. Sóitip baryp, maqalanyń irgetasyn qalaidy. Ámirhan deitin ushan-teńiz álem ǵoi. Men Ámirhan dúnieden ótkeli beri ony oilamaǵan bir kúnim joq. Kúnige oilaimyn, kúnige mindetti túrde esime Ámirhan túsedi. Biz kórshi turamyz ǵoi, keide jumystan kele jatqan kezde, balkonnan «Máke, qalai» dep qol bulǵap turatyn. Sol jerde júrgen siiaqty, kózge kórinbei eles júrgen siiaqty. Ámirhannyń qazasyn alǵash estigen de men boldym, aýyr jaǵdai boldy. Ámirhandy da eli, jurty, halqy alaqanyna salyp aialap, shyǵaryp saldy. Sonda anasy Tursyn apamyz tebirendi», – deidi Maraltai Raiymbekuly
Al qalamdasy Jaras Sársek Ámirhan Balqybektiń tegin adam emes ekenin tilge tiek etip, ol shyǵarma jazarda qandai kúide bolatynyn eske aldy.
«Tegin adamda arqa bolmaidy ǵoi, Ámirhan tegin adam emes. Onyń arqasy boldy. Topqa túskende kóziniń shyradai janýy, ózin ózi bilei almaýy, sonyń bári aqynǵa tabiǵattan berilgen arqa ǵoi dep esepteitinbiz. Sharshy topta óleń oqyǵanda, sóz sóilegende janyp ketetin.
Stýdent kezimizde bir bólmede turdyq. Úlken ómirge aralasqan kezde de bir úide turdyq. Ol tańerteń jýynǵan kezde de yńyldap án salyp júretin. Men ony án salyp júr dep oilamaitynmyn. Bolashaq shyǵarmanyń sulbasyn elestetip júr dep oilaitynmyn. Kóbinese Tabyldyń ánderin salatyn. Halyq ánderinen de yńyldap án salyp júretin. Al tústen keiin qarasań, ol jańa bir shyǵarmanyń súiegin qalap shyqqandai qýanyshtan yńyldap kelip, án salyp, «Jáýke, mynany tyńdap kóresiń ba? Búgin jazdym» deitin. «Tańerteń án salǵan kezdegi dúnień osy emes pa seniń?» deimin ǵoi. Yrǵaǵyn izdeý, bolashaq jazylatyn shyǵarmanyń yrǵaǵyn taýyp alý ǵoi án salýy. Ámirhannyń uǵymyndaǵy án salý yńyldaý bolatyn, ol án salýǵa kelmeitin shyǵar» – deidi Jaras Sársek.
Al Erlan Júnis onyń erekshe qabiletin eske alyp, onyń erekshe minezi týraly da aitty.
«Meniń kóz aldymda qalǵan birneshe kórinisi bar. Ol kórinisterde ár túrli sitýatsiialarda, ártúrli oryndarda, ártúrli jaǵdailarda... Sonda Ámirhan Balqybektiń sózdi aitý úshin aitady. Ol arnaiy bir aýditoriiaǵa baǵyttamaidy. Arnaiy bir adresaty joq. Belgili bir adamǵa aitpaidy. Ol jai ǵana aitqysy keledi. Osy nárseni men qanshama ret baiqadym. Áńgime aityp otyrǵan kezde ony bireýdiń tyńdap otyrǵany, bireýdiń yrjalaqtap otyrǵany, bireýdiń sóilep otyrǵanynyń mańyzy bolmaidy. Ol óziniń qońyr, azdaǵan qyryly bar daýsymen aitady», – deidi Erlan Júnis.
