Mádeniet jáne sport ministrligi tapsyrysy boiynsha Sh.Aimanov atyndaǵy «Qazaqfilm» AQ jáne Álidar Ótemuratovtyń «Dar Play» kompaniiasymen birlese túsirgen «Ámire» filminiń túsirý jumystary aiaqtaldy, dep habarlaidy «Ult Aqparat» «Qazaqfilmge» silteme jasap.
Kinotýyndynyń túsirý toby kartinanyń treilerin jaryqqa shyǵardy. Ámire Qashaýbaevtyń ómir jolyna arnalǵan kórkem film 2018 jyly 5 sáýirde ulttyq prokatqa shyǵady.
Halyqaralyq túsirilim tobynyń quramynda: amerikalyq qoiýshy-rejisser Djef Vespa (Jeff Vespa), operator - Maksim Osadchii («9 rota», «Stalingrad») bar. Filmniń stsenariiin jazǵan Benjamin A. van der Vin (Benjamin A. van der Veen). Basty rólderdi otandyq akterler Sanjar Mádiev (Ámire) jáne Erkebulan Daiyrov (Mustafa Shoqai) somdaǵan. Sonymen qatar, britandyq akter Ben Aldridj (Ben Aldridge) jáne «Oblast tmy», «Tri bilborda na granitse Ebbinga, Missýri» filmderi arqyly tanylǵan amerikalyq aktrisa Ebbi Kornish (Abbie Cornish) jáne basqa da akterler túsken.
Kartinanyń bas prodiýseri, DAR kompaniiasynyń negizin qalaýshy Álidar Ótemuratov aldaǵy tusaýkeser týraly bylai dedi:
«Biz zamandastarymyzǵa Ámire Qashaýbaevtyń qiyn ómir jolyn jáne filmde shyrqalatyn onyń daýysyn estýge múmkindik bergimiz keledi. Ámireni jaqyn tanyp, ulttyq dástúrli ónermen etene tanysqan otandastarymyzdyń boiynda maqtanysh sezimi oianady dep senemin. Óitkeni, bizdiń mýzyka mádenietin qalyptastyrǵan osyndai adamdar, esimder bizdiń tarihymyzda qalýǵa tiisti. Álem kinematografiiasynda mýzyka dramasy janrynda túsirilgen filmder kóp emes. Sondyqtan otandyq kórermenderge bul janrdaǵy kartinany kórip, ótken ǵasyrdyń 30-jyldaryna saiahat jasaý qyzyqty bolýǵa tiisti dep oilaimyn. Bul Qazaqstan kinematografiiasyn jańa satyǵa kóterýge baǵyttalǵan biregei kartina bolmaq. Otandyq kórermender joǵary deńgeide baǵalaidy dep úmittenem», - dedi Kartinanyń bas prodiýseri, DAR kompaniiasynyń negizin qalaýshy Álidar Ótemuratov.
1925 jyly Parijde ótken Exposition Internationale des Arts Décoratifs et Industriels Modernes sheńberinde ótken búkilálemdik mýzykalyq baiqaýda Eýropa kórermenderine qazaqtyń dástúrli ánshilik óneri men qara dombyrasyn pash etken 36 jastaǵy Ámire Qashaýbaev KSRO delegatsiiasynyń arasynan top jaryp, ekinshi oryndy jáne kúmis medal ielendi.
Film, sondai-aq, daryndy ánshi Ámire Qashaýbaevtyń djaz oryndaýshysy Djordj Gershvinmen dostyǵy týraly syr shertedi. «Ámire» filmi Parij aspanyn ánge bólep, kúlli álemdi tamsandyrǵan Ámire Qashaýbaevtyń 130 jyldyǵyna shyqqaly otyr.
Filmde Ámire Qashaýbaevtyń repertýaryndaǵy «Balqadisha», «Úsh dos», «Dýdarai», «Bes qarager» jáne t.b. ánderi oryndalady. Kartina Latviia, Los-Andjeles qalalarynda túsirildi. Sondai-aq filmniń sońǵy túsirý jumystary Almaty oblysy Úshqońyr aýylynyń mańynda júrgizildi.
Ámire Qashaýbaevtyń esimin keń nasihattaý maqsatynda byltyr «Ámire Parijde» atty kitap jaryq kórgen bolatyn.
«Ámire» filmi «Qazaqfilmniń» 2018 jyldaǵy birlesken aýqymdy alǵashqy jobasy bolmaq. Qazir QHR-men birlesken «Kompozitor» filmi montajdaý kezeńinde tur. Kórkem týyndy ekinshi dúniejúzi soǵysynda Almatyda ómir súrgen qytailyq kompozitor Si Sin Haidyń ómiri men qazaqtyń uly kompozitory Baqytjan Baiqadamov arasyndaǵy dostyǵy týraly baiandaidy.
Atalǵan týyndyny Mádeniet jáne sport ministrligi tapsyrysy boiynsha Sh.Aimanov atyndaǵy «Qazaqfilm» AQ jáne Álidar Ótemuratovtyń «Dar Play» kompaniiasymen birlese túsirgen.
