Kórisý – erteden kele jatqan ata saltymyz. Aqjaiyq aýdany Chapaev aýylynda turatyn kópti kórgen aqsaqal Amanǵali Qaisaǵaliev osylai aitty, dep habarlaidy QazAqparat.
Onyń paiymdaýynsha, Kórisý – kóne zamannan beri qalyptasqan dástúr.
«Qazaq halqy áýelden jasy úlken aǵaiyn-týmany jaqsy syilaǵan. Onyń ústine 14 naýryz týa, alty ai qys boiy bir-birimen kórispegen halyq qýana qushaq jaiǵan. Osy kúni aqsaqaly bar úidi betke alyp, «Armysyz, ata!» nemese «Assalaýmaǵalaikúm, abzal aǵa!» dep, qolyn berip, tós túiistirip, úlkennen bata alǵan», - deidi Amanǵali Qaisaǵaliev.
Kórisý kúni adamdar úiindegi taza kiimin kiip, táýir dúnielerin shyǵaryp, qabyrǵaǵa ilip qoiady. Bar taǵamyn ázirlep, kelgen qonaǵyn kútedi.
Kórisý ǵurpynyń shyǵýy qazaq halqynyń kóshpeli turmysymen tikelei bailanysty. Qazaqtyń qys qystaityn, jaz jailaityn jerleri bólek bolǵany málim. Kóktem shyǵa mal jaiylymǵa ketkende, moiyndary bosap, el bir-birimen amandyq-saýlyq surasyp, saǵynyshyn basqan.
Kórisý kúni dastarhanǵa quran oqytý da jónsiz emes. Ata-babany eske alyp, barsha adamdarǵa amandyq tilep, qurmet kórsetýdiń artyqtyǵy joq.
Syilastyq – qazaqtyń teńdesi joq salty. Kóne túrkiler zamanynan beri jalǵasyp kele jatqan dástúr. Úlkenge tanymasa da, sálem berý – kishiniń mindeti.
«Kórisýdiń erteden kele jatqan deýdiń taǵy bir dáleli bar. Ertede qazaqtar jyldy 40 shildege (kúnge) bólgen. Sonda aptasy 9 kún bolǵan. Sol 9 sanyn eskerip otyrý úlkenderimizdiń arasynda áli de kezdesedi. Aidyń jańasy 14-i bolsa, 29-yn aqyr toǵyz dep, sol kúni kelgen kisige kórispeidi. Qonaqqa barmaidy, jolǵa shyqpaidy», - deidi aqsaqal.
«Kórisý meiramy – Ulystyń uly kúni. Sondyqtan jańa jyl qutty bolsyn dep aityp, jamaǵatqa jaqsy sózin arnap, bata, tilek aitý árkimniń paryzy bolsa kerek. Halqymyzdy yntymaqqa bastap, yrysymyzdy molaitýǵa shaqyratyn merekeni el bolyp toilasaq, utylmaimyz», dep túiindedi oiyn A.Qaisaǵaliev.
Oral qalasynda turatyn belgili ǵalym, filologiia ǵylymdarynyń doktory, professor Murat Sabyrdyń pikirinshe, 14 naýryz – kórisý kúni emes, Kórisý aity. Óitkeni ol bir kúnmen shektelmeidi. Ejelden kúlli qazaq dalasynda bolǵan mereke, keiin umyt qalyp, Qazaqstannyń Batys aimaǵynda ǵana saqtalyp qalǵan. Máshhúr Júsip Kópeev jazbalarynda ertede «14 naýryz, eskishe 1 naýryz kóktemniń birinshi kúni dep qazaq «Naýryzdama» toilaityn edi. Ol 8-9 kúnge sozylatyn edi» deidi. Bylaisha aitqanda, 22 naýryz – kún men túnniń teńelýi, merekeniń shyńy. Qystan aman shyqqan qazaqtar «Bir jasyńmen!» dep, 14 naýryzdan bastap bir aiǵa deiin bir-birin izdep kelip, kórisetin bolǵan.
