«AMANAT» partiiasynyń janyndaǵy Ekonomika, kásipkerlik jáne agrarlyq sektor máseleleri jónindegi respýblikalyq qoǵamdyq keńes músheleri Almatydaǵy Magnum Cash & Carry dúkenindegi áleýmettik mańyzy bar ónimderdiń baǵasyn tekserdi, dep habarlaidy "Ult aqparat" partiianyń baspasóz qyzmetine silteme jasap.
Keńes tóraǵasy, májilismen Amanjan Jamalovtyń aitýynsha, azyq-túlik taýarlary baǵasyna ákimshilik tarapynan júrgiziletin qadaǵalaý jumystarynyń kesirinen, basqa saýda núkteleri óndirýshiler men saýda jelilerin jeńildetilgen nesieleý baǵdarlamasyna qatysýdan qashqaqtap otyr. Áleýmettik mańyzy bar azyq-túlikterdiń baǵasyn ustap turý úshin olar qarajat alady. Soǵan qaramastan bul baǵdarlamanyń tiimdiligi áli de bolsa mardymsyz.
«Baǵa ósip ketpeýi úshin biýdjetten eń qajetti jáne áleýmettik mańyzy bar 19 taýarǵa aqsha bólingen. Turǵyndardyń aitýynsha, aqsha bólingenine qaramastan, ónimderdiń baǵasy qymbattaýda. Máseleni sheshý úshin qazirgi ýaqytta basqa sharalar qarastyrylyp jatyr. Mysaly, muqtaj otbasylarǵa azyq-túlik alý úshin áleýmettik kartalar arqyly aqshalai kómek berýge bolady. Halyqqa kómektesýdiń jolyn tabý kerek», - dedi halyq qalaýlysy.
Aita ketý kerek, jeńildetilgen nesielendirý baǵdarlamasy aiasynda memleket saýda kásiporyndaryna jyldyq 0,01 paiyzben aqsha bóledi. Sonyń ishinde «Magnum» saýda jelisi Almaty qalasynyń ákimdigimen osyndai kelisim-shart jasaǵandardyń biregeii.
«Árine, baǵanyń ósýi - bul bizdiń kásipkerlerdiń qoldan jasap otyrǵany emes. Oǵan kóptegen faktorlar atap aitqanda, basqa elderdegi infliatsiia, mineraldy tyńaitqyshtardyń qymbattaýy jáne taǵy sol siiaqty jaǵdailar áser etedi. Degenmen, baǵany ustap turý úshin sharalar qabyldaý kerek. Kóptegen saýda jelileriniń bul baǵdarlamaǵa qatysqysy kelmeýiniń sebebi, olardyń baǵany ustap turýǵa qarsy bolǵandyǵynan emes, ózderin shamadan tys tekserýdi qalamaǵandyǵynan», - dedi Amanjan Jamalov.
Keibir satyp alýshylar merzimi ótken taýarlardy tómendetilgen baǵamen alady. Buǵan jol bermeý úshin amanattyqtar osy ónim túrlerine arnaiy belgi japsyrýdy usyndy.
Monitoring jumysyn qorytyndylaǵan partiialyqtar qazirgi ýaqytta jeńildetilgen nesie berý baǵdarlamasyna «ToiMart», «Asyl Meat», «Milihan» JK, «Solnechnyi» sút zaýyty siiaqty basqa da saýda jelileri men óndirýshilerdi tartý jumystary qarastyrylyp jatqanyn atap ótti.
Is-sharaǵa partiia qalalyq filialynyń atqarýshy hatshysy Meiirjan Otynshiev, Almaty qalalyq máslihatynyń depýtaty Erbolat Qasymov, «Magnum Cash&Carry» basqarma tóraǵasy Azamat Osmanov jáne salalyq vedomstvolardyń ókilderi qatysty.
