«AMANAT»-tyń Ortalyq apparatynda partiianyń Saiasi keńesiniń otyrysy ótti. Is-sharaǵa Saiasi keńes Biýrosynyń músheleri, Parlament depýtattary, óńirlik filialdardyń atqarýshy hatshylary jáne basqa da partiia músheleri qatysty.
Jiyndy ashqan «AMANAT»-tyń Atqarýshy hatshysy Ashat Oralov osy jyldyń sáýir aiynan bastap partiianyń jańa Saiasi tuǵyrnamasyn ázirleý boiynsha aýqymdy jumys júrgizilgenin atap ótti. Saiasattanýshylardy, sarapshylardy, ÚEU ókilderin tarta otyryp, jumys toby quryldy.
«Qujat jobasy bastaýysh partiia uiymdarynda, partiia filialdarynda jurtshylyqpen qyzý talqylanyp, áleýmettik saýalnama júrgizildi. Jalpy, myńnan astam usynys tústi. Partiianyń strategiialyq qujatynda qoǵam damýynyń barlyq negizgi betalystaryna basa mán berildi. «AMANAT»-tyń jańa Saiasi tuǵyrnamasy partiianyń eń basty qundylyqtary men printsipterin jáne tutastai alǵanda, eldiń keleshegine degen paiymyn kórsetedi. Saiasi keńes músheleriniń qaraýyna kelip túsken barlyq usynysty eskere otyryp, qujattyń túpkilikti redaktsiiasy usynyldy», - dedi Ashat Oralov.
Tuǵyrnamany ázirleý jónindegi jumys tobynyń múshesi, «AMANAT» partiiasynan sailanǵan Májilis depýtaty Erlan Sairovtyń pikirinshe, saiasi qujat Qazaqstan azamattarynyń demokratiia men pliýralizmge degen suranasyna jaýap beredi.
«AMANAT» partiiasynyń árbir múshesi osy qujattyń avtory boldy deýge tolyq negiz bar. Sonymen birge, tuǵyrnamaǵa ult, halyq, memleket, memlekettik til, rýhani bolmys uǵymdarynyń barlyǵy engen jáne eń negizgisi, halqymyzdyń búgini, bolashaǵy qandai bolady degen saýalǵa qatysty naqty tujyrdar bar», - dedi halyq qalaýlysy.
Sondai-aq, jiyn barysynda «AMANAT» partiiasy Túrkistan oblystyq filialynyń atqarýshy hatshysy Beisenbai Tájibaev jáne partiia Saiasi keńesiniń múshesi, Shyǵys Qazaqstan oblystyq máslihatyndaǵy partiia fraktsiiasy jetekshisiniń orynbasary Inessa Chernysheva jáne t.b sóz sóiledi.
Partiianyń Saiasi keńesi otyrysynyń qorytyndysy boiynsha 6 qazanda Astanada ótetin «AMANAT»-tyń kezekten tys XXIV seziniń kún tártibi qabyldandy.
