«Amanat» partiiasynyń aimaqtardaǵy filialdarynyń jumysy kúsheitiledi. Bul týraly «Amanat» partiiasynyń atqarýshy hatshysy Ashat Oralov aitty, dep habarlaidy QazAqparat.
«Búgin elimizdiń Prezidenti, «Amanat» partiiasynyń tóraǵasy Qasym-Jomart Toqaevqa partiiany jańǵyrtý baǵdarlamasyn iske asyrý boiynsha málimet, aqparat berdik. Eń aldymen «Amanat» partiiasynyń kezekten tys sezinde bergen tapsyrmalarynyń oryndalýy boiynsha tolyq aqparat jetikizildi. Ásirese, osy bir aidyń tóńireginde «Amanat» partiiasynyń ortalyq apparaty Qazaqstannyń tórt aimaǵyna shyǵyp, belsendi partiia múshelerimen, bastaýysh partiia uiymdarynyń ókilderimen, ziialyq qaýym ókilderimen, jastarmen kezdesti. Sol kezdesýlerde kóterilgen máselelerdi búgin partiia tóraǵasyna jetkizdik», - dedi Ashat Oralov Aqorda baspasóz qyzmetiniń Telegram-ynda jariialanǵan videoda.
Onyń atap ótýinshe, Memleket basshysynyń partiianyń kezekten tys sezinde bergen tapsyrmalaryn sapaly oryndaý maqsatynda «Talqylau» suhbat alańy iske qosyldy.
«Kóptegen is-sharalarymyz eń aldymen aimaqtarda ótedi degen josparladyq. Ásirese, oblystardaǵy, qalalardaǵy, aýdandardaǵy filialdarymyzdyń belsendiligin arttyramyz dep kózdep otyrmyz. Qoǵamdyq keńester boiynsha da jumystar atqarylatyn bolady. Eń aldymen olardyń sany 1700-den 1 myńǵa qysqartyldy. Qysqartý tek ortalyq apparatta ǵana emes oblystarda 12-den 8-ge, aýdandarda 9-dan 5-ke qysqarady. Bul jergilikti memlekettik mekemelermen birlesip, jumysty sapaly oryndaý maqsatynda qabyldanyp jatqan sheshimder dep oilaýǵa bolady», - dedi partiianyń atqarýshy hatshysy.
Aita keteiik, Memleket basshysy Qasym-Jomart Toqaev «Amanat» partiiasynyń atqarýshy hatshysy Ashat Oralovty qabyldaǵan edi.
