«AMANAT»-tyń óńirlik filialdaryndaǵy 20 konferentsiianyń qorytyndysy boiynsha partiianyń kezekten tys XXIV Sezine 700 delegat sailandy. Sondai-aq, amanattyqtar partiianyń jańa Saiasi tuǵyrnamasynyń jobasyn talqylady. Jalpy, úsh kún ishinde barlyq deńgeidegi konferentsiialar jumysyna 20 myńnan astam adam qatysty.
Aqmola oblystyq máslihatyndaǵy «AMANAT»-tyń depýtaty Saira Mataibaeva atap ótkendei, jańa Saiasi tuǵyrnama biyl naýryzda iske qosylǵan keń aýqymdy partiialyq transformatsiianyń bir bóligi bolyp sanalady.
«Bizdiń basty bailyǵymyz – halyq, basty maqsatymyz – azamattardyń ál-aýqatyn jaqsartý. Tuǵyrnamada qoǵamnyń shoǵyrlandyrýshy kúshine ainalýy tiis jasampaz eńbektiń mańyzdylyǵy týraly aitylady. Biznes-qoǵamdastyqtyń ókili retinde, bul máseleni sheshýge kásipkerlikti jan-jaqty járdemdesý amaly kómektesedi dep aita alamyn», – dedi ol.
Aqtóbe oblystyq ftiziopýlmonologiialyq ortalyǵynyń bas dárigeri Erlan Tátimovtiń aitýynsha, partiialyqtar densaýlyq saqtaý jáne bilim berý máselelerine erekshe nazar aýdaryp keledi.
«Bilim men ǵylymǵa quiylǵan investitsiia – bul bolashaqqa quiylǵan investitsiia. Balabaqshalardyń, jataqhanalardyń jetispeýshiligi máselesin sheshý, úsh aýysymdy mektepterdi joiý, meditsinalyq nysandardyń jabdyqtalýyn jaqsartý qajet. Partiialyqtar osy máselelermen turaqty túrde ainalysady ári bul baǵyttar basty ideologiialyq qujatta kórinis tapqan. Júieli jumystyń bir kórinisi – osy», – dedi ol.
Aita ketý kerek, partiialyqtarǵa áleýmettik saýalnama arqyly Saiasi tuǵyrnama jobasyna qatysty óz pikirin bildirýge múmkindik berildi. Batys Qazaqstandaǵy partiialyqtar da bul jumystan shet qalǵan joq.
«Óńirimizde 217 bastaýysh partiia uiymy bar. Jańa qujat sonyń árbirinde belsendi talqylandy. Oblysymyzdaǵy partiialyqtardyń kóptegen usynysy tuǵyrnamany ázirleý kezinde eskerilgeni qýantady», – dedi partiianyń Batys Qazaqstan oblystyq filialynyń atqarýshy hatshysy Murat Muqaev.
Mańǵystaý oblystyq máslihatyndaǵy «AMANAT»-tyń depýtaty Aiat Súgirbaidyń aitýynsha, qazirgi ýaqytta qoǵamdyq tatýlyq pen kelisimdi saqtaý asa mańyzdy másele bolyp otyr.
«Birlik – memleketimizdiń negizi. Jalpyulttyq biregeilikti nyǵaita otyryp, biz eshqashan elimizdegi ultaralyq jáne konfessiiaaralyq kelisimge kúmán keltirýge jol bermeimiz. Óitkeni damýdyń basty sharty – turaqtylyq pen tynyshtyq ekeni sózsiz», – dedi ol.
Partiianyń jańa Saiasi tuǵyrnamasy Memleket basshysy Qasym-Jomart Toqaevtyń reformalar baǵytyn júzege asyrý úshin jasalǵan, deidi Qostanai oblysyndaǵy partiia músheleri.
«Tuǵyrnamada kórsetilgendei, qazirgi tańda qoǵamnyń basty talaby ádildik pen zań ústemdigin ornatý, sybailas jemqorlyq pen paraqorlyqqa qarsy aiaýsyz kúres bolyp otyr. «AMANAT» partiiasy áleýmettik ádilettilik jaǵynda bolyp keldi, solai bolyp qala beredi. Biz zańdarda jáne ómirde áleýmettik ádilettilik ornatýǵa shaqyramyz», – dedi partiianyń Qostanai oblystyq filialynyń atqarýshy hatshysy Bibigúl Aqqojina.
Túrkistan oblysynda amanattyqtar aýyl sharýashylyǵyn qoldaýdyń mańyzdylyǵyna nazar aýdardy. Túrkistan oblystyq máslihatynyń depýtaty Almas Sálimov partiianyń jańa Saiasi tuǵyrnamasy jobasynda bul máselege erekshe kóńil bólingenin atap ótti.
«Agrarlyq sektor – Qazaqstan ekonomikasynyń mańyzdy quramdas bóligi, aýyldyń ál-aýqatyn kóterý – árbir partiialyqtyń mindeti. «AMANAT» partiiasy aýyldyń ál-aýqatyn jaqsartý, aýyl sharýashylyǵyn qoldaý memleket aldynda turǵan strategiialyq mindetterdiń biri ekenine senimdi», – dedi ol.
Eske sala keteiik, 6 qazanda Astana qalasynda «AMANAT» partiiasynyń kezekten tys XXIV Sezi ótedi. Partiianyń Ortalyq apparaty daiyndyq jumystaryn júrgizýde.
