«AMANAT» partiiasynyń Ortalyq apparatynda Munai-gaz salasy komitetiniń alǵashqy otyrysy ótti. Sonyń barysynda Komitettiń quramy men erejesi bekitildi, dep habarlaidy "Ult aqparat".
Komitet tóraǵasy bolyp Májilistegi «AMANAT» partiiasynyń depýtaty Ǵalym Ámireev, al Komitet hatshysy bolyp Astana qalasyndaǵy «Petrocouncil» ókili Ǵibrat Sársenovsailandy.
Komitet quramyna Energetika, indýstriia jáne infraqurylymdyq damý, Ekologiia, geologiia jáne tabiǵi resýrstar ministrlikteriniń, «QazMunaiGaz», «QazaqGaz» ulttyq kompaniialarynyń, «PSA» JShS, Munai jáne gaz aqparattyq-taldaý ortalyǵynyń, «KazEnergy» qaýymdastyǵynyń, Qazaqstan mashina jasaýshylar odaǵynyń, «KasService», «Argus Media», «Energy Monitor», «Energy Analytics» ókilderi, sondai-aq biznes-qaýymdastyqtar, táýelsiz sarapshylar men taldaýshylar kirdi.
«AMANAT» partiiasynyń Hatshysy Eldar Jumaǵaziev atap ótkendei, Komitettiń negizgi mindeti munai-gaz salasyndaǵy túitkildi máselelerdi anyqtaý jáne ony sheshý jolyn ázirleý, zańnamalyq bazany jetildirýge bastamashylyq etý jáne usynystar engizý, sondai-aq sala ókilderi men olardyń qyzmetkerleriniń quqyǵyn, zańdy múddelerin qorǵaýdy qamtamasyz etý bolmaq.
«Komitet aldynda munai-gaz salasyn damytý, sonyń ishinde túitkildi máselelerdi sheshý jóninde aýqymdy mindet tur. Saladaǵy keibir kompaniialardyń jasyryn monopoliialyq jaǵdaiy, keibir iri munai-gaz jobalaryndaǵy jergilikti qamtýdyń az úlesi, dizel otynynyń jyl saiynǵy tapshylyǵy jáne maýsymdyq baǵa ósimi týraly bárimiz bilemiz. «AMANAT» partiiasynyń alańynda memlekettik organdarmen, ulttyq kompaniialarmen, beiindi qaýymdastyqtarmen jáne naryq ókilderimen birlesip, osy máselelerdi sheshý jolyn qarastyramyz», – dedi komitet tóraǵasy Ǵalym Ámireev.
Óz kezeginde, Qazaqstan munai-servis kompaniialary odaǵynyń tóralqa tóraǵasy Rashid Jaqsylyqov sheshimin kútip turǵan birqatar ózekti máselelerdi atap ótti.
«Komitettiń salalyq jáne kásibi quramyn eskere otyryp, birinshiden munai-gaz salasyn damytý, sonyń ishinde iri munai-gaz jobalary boiynsha kelisimsharttardy qaita qaraý jóninde naqty usynystar ázirleýge kirisýimiz kerek. Ekinshiden, otandyq jabdyq óndirisiniń, saladaǵy jergilikti IT-mamandardyń tapshylyǵyn nazarǵa alýǵa tiispiz. Sondai-aq, halyqaralyq kompaniialar elimizde servistik ortalyqtar ashpaidy. Sertifikattaý ortalyqtary joq», – dedi ol.
Sondai-aq, otyrys barysynda Komitet músheleri taýarlar men qyzmetterdi satyp alý, salyq jeńildigin usyný, munai-gaz salasyndaǵy otandyq taýarlar katalogynyń bolmaýy syndy birqatar máselelerdi kóterdi.
Otyrys qorytyndysy boiynsha, Komitet jumysyn zań jobalaý qyzmetine, fiskaldyq preferentsiialardy ázirleýge, qoldanystaǵy jáne bolashaq munai-gaz jobalarynda taýarlardyń, jumys men kórsetiletin qyzmetterdiń qazaqstandyq úlesin ulǵaitý jónindegi sharalardy usynýǵa shoǵyrlandyrý týraly sheshim qabyldandy.
