AMANAT partiiasynyń 2030 jylǵa deiingi baǵdarlamasy kúshin joidy. Mundai sheshim búgin partiianyń kezekten tys XXIV sezinde qabyldandy, dep habarlaidy QazAqparat.
«Keshe partiianyń saiasi keńesi otyrysynda partiianyń jańa saiasi platformasyn maquldaý jáne ony partiianyń sezine shyǵarý týraly sheshim qabyldanǵan bolatyn. Buǵan deiin qujat bastapqy partiia uiymdarynda, partiianyń óńirlik jáne aýmaqtyq filialdarynyń konferentsiialarynda qaralyp, tolyqtai qoldaý tapqan edi. Sondyqtan búgingi sóz sóileýlerdi eskerip, AMANAT partiiasynyń jańa saiasi tuǵyrnamasyn bekitý týraly qaýly qabyldaý usynylady.
Sonymen qatar, partiianyń jańa saiasi platformasynyń qabyldanýyna orai, partiianyń 2030 jylǵa deiingi saiasi tuǵyrnamasy men baǵdarlamasynyń kúshin joiý usynylyp otyr», - dedi partiianyń atqarýshy hatshysy Ashat Oralov.
Osydan keiin sezd delegattary usynystardy qoldap daýys berdi.
Partiia basshysy – Parlament Májilisiniń tóraǵasy Erlan Qoshanov jańa tuǵyrnamanyń basty qaǵidasyn aitty.
«Jalpy, búgingi sezdi tarihi sezd dep aitýǵa tolyq qaqymyz bar. Biz partiianyń jańa Saiasi tuǵyrnamasyn qabyldadyq. Onyń basty qaǵidasy – adam, qoǵam jáne memleket. Ondaǵy printsipter Prezidentimizdiń saiasi reformalarymen úndes ári sabaqtas. Partiia aldaǵy qyzmetinde osy ustanymdardy basshylyqqa alady», - dedi ol.
Qoshanov atalǵan tuǵyrnamany daiyndaýǵa partiianyń óńirlerdegi músheleri belsene qatysqanyn basa aitty.
«Sol úshin barshańyzǵa rizashylyǵymdy bildiremin. Endigi kezekte tuǵyrnama eldiń maqsat-múddesine sai jumys jasaýy kerek. Ony tolyq júzege asyrý úshin biz barlyǵymyz bir kisidei atsalysýymyz qajet», - dedi partiia tóraǵasy.
