Foto ©️ Tengrinews.kz / Álihan Sariev
Almaty oblysynda "Altyn Orda" bazarynyń burynǵy atqarýshy direktory sottaldy, - dep habarlaidy "Ult aqparat" Tengrinews.kzke silteme jasap.
Almaty oblystyq sotynyń baspasóz qyzmeti "Altyn Orda" bazarynyń burynǵy atqarýshy direktory Ermek Marqabaevqa qatysty úkim shyǵarylǵanyn habarlady. Oǵan 296-baptyń 4-bóligi "Esirtki, psihotroptyq zattarmen, sol tektestermen ótkizý maqsatynsyz zańsyz jumys isteý" boiynsha aiyp taǵyldy.
Sot málimetinshe, byltyr jazda Almaty - Bishkek tasjolynda politsiia qyzmetkerleri artqy jolaýshylar oryndyǵynda sottalýshy otyrǵan avtokólikti toqtatqan. Jeke tintý kezinde onyń ishinde untaq zat bar bailam tabylyp, tárkilendi. Sot-himiialyq saraptama nátijeleri boiynsha bul zat psihotropty zat bolyp shyqty - salmaǵy 1,796 gramm bolatyn mefedron.
Prokýror sottalýshyny kináli dep taýyp, 5 jylǵa bas bostandyǵynan aiyrýdy surady. Sottalýshy óz kinásin moiyndamai, aiǵaq berýden bas tartty.
"Sot jaza taǵaiyndaý kezinde sottalýshy M.-nyń balasynyń bolýyn qylmystyq jaýaptylyq pen jazany jeńildetetin mán-jai retinde tanydy.
Qylmystyq jaýaptylyqty nemese jazany aýyrlatatyn mán-jailar anyqtalǵan joq. Sot úkimi boiynsha, M., QK-niń 296-baby 4-bóliginde kózdelgen qylmystyq quqyq buzýshylyqty jasaǵany úshin kináli dep tanylyp, oǵan 4 jyl merzimge bas bostandyǵynan aiyrý jazasy taǵaiyndaldy", - dep habarlady sottyń baspasóz qyzmeti.
Eske salaiyq, Ermek Marqabaev 2023 jyldyń maýsymda "Altyn Orda" mańynda ustalǵan bolatyn. Sodan keiin politseiler tintý kezinde odan untaq pen tapansha tabylǵanyn habarlady.
