Búgin Úkimet otyrysynda Nur-Sultan qalasynyń ákimi Altai Kólginov elordany gazdandyrý jumysy qalai júrgizilip jatqanyn baiandady, dep habarlaidy "Ult aqparat".
Elbasynyń «5 áleýmettik bastamasyna» sáikes jáne Memleket basshysynyń tapsyrmalary boiynsha elordany gazdandyrý jáne turǵyndardy tabiǵi gazben qamtamasyz etý aiasyndaǵy jumystar josparǵa orai júrgizilip jatyr. Gaz tartý jelileriniń qurylysy úsh kezeńge bólingen. Iske qosý kesheninen turatyn jobanyń 1-kezeńiniń qurylysy 2019 jyldyń kúz aiynda bastaldy. Qazirgi ýaqytta «Kóktal» turǵyn úi alabyna keletin gaz jelisiniń qurylysy tolyqtai aiaqtaldy. «Jeleznodorojnyi» turǵyn úi alabyna gaz tartý jelileri tolyǵymen 100 paiyz ornatyldy. Atalǵan jelilerge servistik qyzmet kórsetý úshin olar «QazTransGaz» AQ-qa berildi», - dedi ol.
Onyń dereginshe, «Kóktal-1», «Kóktal-2», «Óndiris» turǵyn úi alaptarynda jáne «Agroqalashyqtyń» bir bóliginde jumystar aiaqtalýǵa jaqyn. Atap aitqanda, qurylys-montajdaý jumysy bitip, onda gaz jelileri tekserilip jatyr.
«QazTransGaz» AQ «Kúigenjar», «Michýrin», «Internatsionalnyi» turǵyn úi alaptaryn gazdandyrýdy kestege sáikes júrgizip jatyr. Jalpy qala turǵyndarynyń tórtten bir bóligi turatyn atalǵan turǵyn úi alaptarynda 300 shaqyrymǵa jýyq gaz jelisi tartyldy. Kelesi jyly «Agroqalashyq» jáne «Ońtústik shyǵys» turǵyn úi alaptaryn tolyqtai qamtamasyz etetin 3 iske qosý kesheni paidalanýǵa beriledi. Gazdandyrýdyń 2 jáne 3 kezeńi boiynsha jobalaý, izdestirý jumysy júrgizilý ústinde. Olardy júzege asyrý respýblikalyq jáne jergilikti biýdjet esebinen, sonymen qatar jeke investitsilar tartý arqyly josparlanǵan», - dedi Altai Kólginov.
